Հայաստանի հանրապետական կուսակցության փոխնախագահ Արմեն Աշոտյանը իր ֆեյսբուքյան էջում ուղիղ եթերի ընթացքում անդրադարձավ խորհրդարանական դիվանագիտությանը։
Նա նշեց, որ օրերս ԵԱՀԿ խորհրդարանական վեհաժողովի շրջանակներում կազմակերպվել է մի միջոցառում, որը նվիրված է եղել COVID-19-ի ազդեցությանը բնապահպանական խնդիրների վրա։ Միջոցառմանը մասնակցել է մոտ 100 պատվիրակ, այդ թվում՝ մոտ 40 պատգամավոր՝ տարբեր երկրներից, Արժույթի միջազգային հիմնադրամի փոխտնօրենը, Հարվարդի համալսարանի դասախոսներ և այլք։
«Շատ մեծ էր զարմանքս, հիասթափությունս ու ջղայինությունս, երբ որ այս տեսակոնֆերանսի տեսանյութերը դիտելիս տեսա Ադրբեջանի պատվիրակության մի անդամի ելույթ։ Այդ ելույթը ամբողջությամբ նվիրված էր կրկին Հայաստանին, Ղարաբաղին, և մեղադրում էր մեզ՝ հայերիս, բոլոր տեսակի մեղքերի մեջ»,- ասաց Արմեն Աշոտյանը՝ հավելելով, որ նման խոսքը միջազգային խորհրդարանական հարթակում անպատասխան թողնել չի կարելի։ Եվ շատ կարևոր է պատասխանելը, որ միջազգային հանրության մոտ չստեղծվի թյուր պատկերացում Հայաստանի և Արցախի հակամարտության խնդիրների մասին. «Եվ ահա արձանագրեցի, որ Հայաստանի խորհրդարանից որևէ մեկը այնտեղ ելույթ չի ունեցել։ Առաջ անցնելով ասեմ՝ չգիտեմ, թե այդ հարյուր մասնակիցների մեջ Հայաստանից մարդ գրանցվե՞լ է, թե՞ չէ, որովհետև մասնակիցների ցանկը տեսակոնֆերանսի պարագայում չի երևում ամբողջությամբ, բայց անգամ եթե գրանցվել է, ադրբեջանական զառանցանքները մնացել են անպատասխան»։
Արմեն Աշոտյանը նկատեց, որ ադրբեջանցի պատվիրակների հակահայկական ելույթները նախկինում երբևէ առանց պատասխան չեն մնացել. «Իրավիճակին լրացուցիչ դառնություն է հաղորդում այն հանգամանքը, որ Ադրբեջանի պատվիրակության կողմից մասնակցում էր մի նորընտիր պատգամավոր, որը կարող ենք ասել, որ տխրահռչակ պատգամավոր է, իր ազգանունը Գանջալիև է։ Գանջալիև պատգամավորը ներկայանում է արտերկրում և սեփական երկրում որպես, ուշադրություն այստեղ, Լեռնային Ղարաբաղի ընտրյալ ներկայացուցիչ»։
Կարդացեք նաև
https://www.facebook.com/armen.ashotyan/videos/10221735354231235
Ամի ՉԻՉԱԿՅԱՆ
