«Ճաշակի չափորոշիչներ չկան եւ չեն կարող լինել: Հեռարձակողները պետք է բավարարեն բոլոր սոցիալական խմբերի ճաշակային պահանջմունքները»,- հեռուստատեսության եւ ռադիոյի հանձնաժողովի տարեկան հաղորդման ներկայացման ժամանակ այսօր ԱԺ նիստում ասաց ՀՌՀ նախագահ Տիգրան Հակոբյանը՝ արձագանքելով հեռուստաեթերի բովանդակության մասին պատգամավորների մտահոգություններին:
«Եթե մարդիկ կան, որոնք սիրում են այս կամ այն երգչի համերգը, ապա այդ երգչի համերգը եթերում պետք է լինի: Եթե կա պահանջարկ հնդկական սերիալ նայելու, որը չի պարունակում էրոտիկա, բռնություն, ապա այն պետք է ցուցադրվի»,-համոզմունք հայտնեց Տիգրան Հակոբյանը:
Նա հիշեց, որ դեռեւս 1990-ին մի տոնի առիթով հեռուստաընկերություններից մեկի խորհուրդը նստած որոշում էր՝ Արամ Ասատրյանի երգերից մեկը թույլատրե՞լ հնչել, թե ոչ. «Դա ռաբիս երգ չէր, թեթեւ երգ էր: Իհարկե, դա ճիշտ չէր, բայց այդ ժամանակ խորհրդային չափանիշներ կային»:
ՀՌՀ նախագահի խոսքով՝ եթե հեռուստաեթերից հնչող եւ ցածրաճաշակ համարվող երաժշտությունը չի հակասում օրենսդրական նորմերին, ապա հեռուստաընկերությունից ճաշակ պահանջելը եւս չի տեղավորվում օրենքի շրջանակում:
Կարդացեք նաև
Լուիզա ՍՈՒՔԻԱՍՅԱՆ
