Հեռուստատեսության եւ ռադիոյի հանձնաժողովի տարեկան հաղորդման ներկայացման ժամանակ այսօր ԱԺ նիստում «Իմ քայլի» պատգամավոր Թագուհի Ղազարյանը հանձնաժողովի նախագահ Տիգրան Հակոբյանին խնդրեց ներկայացնել իր զեկույցի այն դրվագի մանրամասները, ըստ որի՝ 2 հեռուստաընկերության նկատմամբ կիրառել է տուգանք, որոնցից մեկը վերաբերում է կրոնական բնույթի հաղորդման ընթացքում խտրականության եւ ատելության խոսքի քարոզ իրականացնելուն, իսկ մյուսը՝ բռնության, կտտանքների ենթարկելու տեսարաններ ցուցադրելուն: Պատգամավորը հետաքրքրվեց՝ մի՞թե հեռուստաեթերն այնքան մաքուր է, որ երկու դեպք է միայն արձանագրվել:
Տիգրան Հակոբյանը նախ փաստեց, որ հանձնաժողովը չունի համապատասխան օրենսդրական գործիքներ, որպեսզի արձագանքի ցանկացած այդպիսի դրսեւորման, մյուս կողմից՝ դժվար է տեղորոշել, թե որն է բռնության տեսարանը, որը կարող է առկա լինել նաեւ պատմական ֆիլմերում. «Նախորդ տարի առաջին անգամ երկու հեռուստաընկերություն պատժվել է կրոնական խտրականության եւ բռնության տեսարանների համար, այսինքն՝ առաջին անգամ կիրառել ենք օրենսդրական նորմը: Մեկը եղել է մարզային, մյուսը՝ հանրապետական սփռման հեռուստաընկերություն: Առաջին դեպքում ամերիկյան կազմակերպությունը հեռուստաժամ էր գնել եւ քարոզ էր իրականացնում, մյուս դեպքում՝ ընտանեկան պատմություն ներկայացնելիս` կնոջ հանդեպ երկար տեւող բռնության տեսարան էր ցուցադրվում»:
Հակոբյանի խոսքով՝ հեռուստաընկերություններից մեկն ընդունեց մեղքը, մյուսը՝ դիմեց դատարան. «Սա հիմնավորում է, որ բռնության տեսարանը հիմնավորելն այսօր շատ դժվար է»:
Թագուհի Ղազարյանը հարցրեց՝ ինչո՞ւ այդ երկու դեպքն առանձնացվեցին: Հակոբյանը տեղեկացրեց. «Հնարավորություն չունենք անմիջապես դիտարկելու բոլոր հեռուստաընկերությունները: Ամսվա ընթացքում, ըստ օրենքի, հինգ օր ենք դիտարկում հեռուստաընկերությունների եթերաժամը»:
Կարդացեք նաև
«Իմ քայլի» պատգամավոր Նազելի Բաղդասարյանը հայտարարեց՝ հեռուստաընկերություններից մեկին պատասխանատվության ենթարկելու հիմքում իր դիմումն է հանձնաժողովին, ընդ որում՝ այն վերաբերում է այն հեռուստաընկերությանը, որում նա աշխատել է, եւ սա վկայում է այն մասին, որ պատգամավորը պետք է լինի անաչառ:
Լուիզա ՍՈՒՔԻԱՍՅԱՆ
