«Իրատեսի» զրուցակիցն է Երևանի ավագանու «Լույս» խմբակցության ղեկավար, «Լուսավոր Հայաստան» կուսակցության կառավարման խորհրդի անդամ ԴԱՎԻԹ ԽԱԺԱԿՅԱՆԸ։
–Իշխանությունն արտակարգ դրությունը երկարաձգեց ևս մեկ ամսով: Ի վերջո՝ սա ինչ–որ բան տալի՞ս է, թե՞ այն, առաջին հերթին, մարդկանց ազատ տեղաշարժն ու հավաքները սահմանափակելու նպատակ ունի:
– Համավարակի դեմ պայքարի առաջին իսկ օրվանից դժվար էր հասկանալ՝ որն է իշխանության մարտավարությունը, դրա արդյունավետությունը կամ ենթատեքստը։ Ինքս հետևում եմ պարետի կողմից սահմանված բոլոր կանոններին և շատ եմ ուզում, որ մեր բոլոր հայրենակիցները պահպանեն դրանք, բայց ինձ համար դժվար է պատասխանել Ձեր հարցին՝ արտակարգ դրությունը կամ կառավարության կողմից իրականացվող հակաճգնաժամային մյուս միջոցառումներն առհասարակ ինչ-որ բան տալի՞ս են, թե՞ ոչ: Ինչու՞, որովհետև շաբաթներ շարունակ նույն՝ չնահանջող ու օրինաչափություն դարձած պատկերն ենք տեսնում, այն է՝ թեստավորված անձանց մոտ 30 տոկոսի թեստի պատասխանը դրական է լինում: Եվ անկախ հանգամանքից, թե դիմակ դնել-չդնելու կամ սոցիալական հեռավորությունը խախտելու մասին Facebook-ի իր անձնական էջում քանի լուսանկար կհրապարակի վարչապետ Նիկոլ Փաշինյանը, ոստիկանությունը քանի քաղաքացու բերման կենթարկի դիմակ չդնելու համար, այդ համամասնությունը պահպանվում է: Այս օրինակներով, բնականաբար, չեմ ուզում պնդել, թե դիմակ դնելն արդյունավետ չէ, բայց վստահորեն հայտարարում եմ՝ համավարակի դեմն առնելը միայն դիմակ դնել-չդնելով չի լուծվում: Չեմ կարող ասել, թե հակահամաճարակային տեսանկյունից արտակարգ դրության ռեժիմ սահմանելն ինչքանով է արդյունավետ, բայց ակնհայտ է՝ արտակարգ ռեժիմն իշխանության շահերից է բխում: Այն հնարավորություն է տալիս շարունակելու տեղորոշել մարդկանց, սահմանափակել մարդկանց ազատ հավաքներ կազմակերպելու իրավունքը կամ դա հայեցողաբար թույլատրել: Օրինակ՝ իրավապաշտպան Ռուբեն Մելիքյանին Ազգային ժողովի դիմաց միայնակ ցույց անել չի կարելի, բայց իշխանության կցորդ Արման Բաբաջանյանը նախագահականի դիմաց մի խումբ մարդկանց հետ «պիկետ» կարող է անել:
–Առողջապահության նախարարն այս օրերին աչքի է ընկնում քաղաքական բնույթի գրառումներ անելով ու քաղաքական ուժերին «դասեր տալով»: Որտեղի՞ց նրան այդքան ժամանակ:
-Արսեն Թորոսյանը, կոմպետենտության բացակայության և մեծախոսության իմաստով, այս իշխանության խորհրդանիշն է։ Նրա անլուրջ վերաբերմունքի և ուշացած քայլերի հետևանքն է այսօրվա իրավիճակը: Ժողովրդավար ցանկացած երկրում առողջապահության այսպիսի նախարարը աշխատանքից ազատման դիմումը վաղուց էր գրել: Բայց քանի որ նրա վերադասը մեծ կարծիքի է իր նախարարի մասին և համարում է, որ նրանից լավ այս իրավիճակում ոչ ոք չէր կարող կառավարել, Թորոսյանը դեռ կշարունակի պաշտոնավարել։ Նախարարն այսօր իր քաղաքական հակառակորդների դեմ ավելի ջանասիրաբար է պայքարում, քան համավարակի: Պատմությունը նման մարդկանց չի մոռանում, ու Թորոսյանի անունը, կարծում եմ, հիշատակվելու է որպես ծայրաստիճան ոչ կոմպետենտ և համավարակի դեմ պայքարը ձախողած պաշտոնյայի։
Կարդացեք նաև
–Իշխանությունն ասում է՝ մի քննադատեք, պատերազմ է, չի կարելի, պետք է մի բռունցք լինենք: Իսկ նրանք գիտակցու՞մ են պատերազմական պահի լրջությունը:
– Իշխանության մոտ այդպիսի ամպագոռգոռ համեմատություններ անելը շատ լավ է ստացվում։ Հայտնի անեկդոտի նմանությամբ՝ ընդդիմությանը հորդորում են, թե խնդիրների մասին մի՛ բարձրաձայնեք, ոչինչ մի արեք առհասարակ, այլ ուղղակի «թուլացեք և հաճույք ստացեք»: Եթե սա պատերազմ է, ուրեմն այն սկսվելու պահից ի վեր կառավարությունը տանուլ է տվել: Տեսնու՞մ եք ռեստորանային բիզնեսի ներկայացուցիչների դժգոհություններն ու ընդվզումները: Նրանք վառ ապացույցն են այն բանի, որ ձախողումը ոչ միայն առողջապահական է, այլ նաև տնտեսական։ Առանցքային մի շարք ոլորտներում խոր ճգնաժամ է, ինչն օր օրի ահագնանում է, իսկ կառավարությունը համարժեք աջակցություն չի ցուցաբերում մարդկանց:
Զրույցը՝
Սևակ ՎԱՐԴՈՒՄՅԱՆԻ
Հոդվածն ամբողջությամբ՝ «Իրատես» թերթի այսօրվա համարում:
