Հոկտեմբերի 2-ին կրկին մարդաշատ էր Կապանի սուրբ Մեսրոպ Մաշտոց եկեղեցին։ Կապանցիները վերջին հրաժեշտը տվեցին սեպտեմբերի 29-ին զոհված Շավարշ Մուրադյանին։
Ծնվել է 1996 թվականին Կապանում։ Սովորել է Կապանի թիվ 7 եւ թիվ 3 դպրոցներում: Սովորելու տարիներին աչքի էր ընկնում դպրոցական առարկայական օլիմպիադաներում, 11-րդ դասարանում շահեց «ՖԼԵՔՍ» մրցույթում եւ ուսումը շարունակեց Ամերիկայի Միացյալ Նահանգներում: ԱՄՆ-ից վերադառնալուց եւ դպրոցն ավարտելուց հետո ընդունվեց Հայաստանի Ամերիկյան Համալսարան: 2015 թ. զորակոչվեց Հայկական բանակ, մասնակցել Ապրիլյան քառօրյա պատերազմին:
Եկեղեցուց սյունեցիները շարժվեցին Կապանի Բաղաբուրջի հուշահամալիր, որտեղ զինվոր նահատակին հուղարկավորեցին զինվորական պատիվներով։
Ընդամենը երկու օր առաջ էլ Սյունիքի մարզկենտրոնի բնակիչները հրաժեշտ տվեցին սեպտեմբերի 27-ին Ադրբեջանի կողմից սկսած պատերազմում զոհված կապանցիներին՝ Գառնիկ Խլղաթյանին, Սասուն Ներսիսյանին, Արամ Գրիգորյանին:
Կարդացեք նաև
Գառնիկ Խլղաթյան
Գառնիկ Խլղաթյանը ծնվել է 2001 թ. հուլիսի 28-ին Կապանում: Հիմնական կրթությունը ստանալուց հետո ընդունվել է Կապանի պետական բժշկական քոլեջ: 2019 թ. դեկտեմբերին զորակոչվում է ՀՀ զինված ուժեր եւ ծառայում Պաշտպանության բանակի հյուսիսային ուղղությամբ տեղակայված զորամասի հետախուզական վաշտում: Զոհվել է 2020 թ. սեպտեմբերի 27-ին մարտական գործողությունների ժամանակ, հակառակորդի անօդաչու թռչող սարքի հարվածից:
Սասուն Ներսիսյան
Սասուն Ներսիսյանը ծնվել է 2002 թ. մարտի 21-ին Կապանում: Նախ սովորել է թիվ 13 հիմնական դպրոցում, ապա կրթությունը շարունակել Սյունիքի տարածաշրջանային քոլեջի «Կապի սարքավորումների մոնտաժում եւ շահագործում» մասնագիտությամբ: 2020 թ. հուլիսին զորակոչվել է ՀՀ զինված ուժեր եւ ծառայության անցել Պաշտպանության բանակի հարավային ուղղությամբ տեղակայված Հադրութի զորամասում: Անօդաչու թռչող սարքի պայթյունից զոհվել է սեպտեմբերի 27-ին:
Արամ Գրիգորյան
Արամ Գրիգորյանը ծնվել է 2000 թ. դեկտեմբերի 5-ին Կապանում: Նախ՝ սովորել է Կապանի թիվ 6 հիմնական դպրոցում, այնուհետեւ տեղափոխվել Աճանանի միջնակարգ դպրոց, ավարտելով՝ ընդունվել ՀԱՊՀ Կապանի մասնաճյուղ: 2019 թ. հունվարի 23-ին զորակոչվեց պարտադիր զինվորական ծառայության: Նախ՝ ծառայում էր Գյումրիում տեղակայված զորամասերից մեկում։ Ստանալով սերժանտի կոչում՝ տեղափոխվել է Պաշտպանության բանակի հարավ- արեւելյան ուղղությամբ տեղակայված զորամաս:
«Կապանի թիվ 6 հիմնական դպրոցի փառքի սրահը արդեն համալրվեց եւս մեկ անմահ անունով՝ Արամ Սամվելի Գրիգորյան: Ցավոք, մարեց եւս մի տան ճրագ, փլվեց տան սյունը…Ո՞ւր ես Արա՛մ…Անասելի տխուր ենք բոլորս եւ միաժամանակ հպարտ, որ մեր հերոսական դպրոցը կրկին անմասն չմնաց մերօրյա գոյամարտից: Օրացույցի մեջ այս սեպտեմբերը արյունով ներկվեց, ու ամիսն ամբողջ վշտով ողողվեց: Արամի նման քանի՜ ջահել-ջիվանների երկնաշող երազներ բեկվեցին, ու պայծառ գալիքի իղձեր մշուշվեցին…Տղերք, գիտցեք, ձեր արյունն իզուր չի թափվել, ու ձեր սխրանքն երբեք չի մոռացվի…Հավերժ փառք ձեզ, մերօրյա հերոսներ»,–ասված է դպրոցի տարածած հայտարարության մեջ։
Սասուն Ներսիսյանի, Գառնիկ Խլղաթյանի եւ Արամ Գրիգորյանի աճյունները նույնպես ամփոփվեցին Բաղաբուրջի հուշահամալիրում՝ ապրիլյան քառօրյայում նահատակված զինվորների հարեւանությամբ։
Արմեն ԴԱՎԹՅԱՆ
