ԱՀ նախագահի խորհրդական Դավիթ Բաբայանն ասուլիսում անդրադառնալով Արցախում ընթացող պատերազմին եւ Թուրքիայի կողմից ներգրավված ահաբեկչական խմբերին եւ դրանից բխող վտանգավոր զարգացումներին, ասաց՝ թուրք-ադրբեջանական-ահաբեկչական այս եռամիասնությունը շատ վտանգավոր քայլեր է ձեռնարկում։
«Վերջին օրերին նրանց կարեւոր ռազմական թիրախներից մեկը Արաքս գետի վրա Խուդաֆերինի կամուրջի մոտակայքում կառուցված ջրամբարին տիրանալն է։ Սա շատ խոշոր ջրամբար է, կառուցվել է Արաքս գետի վրա, Իրանի ֆինանսական միջոցներով։ Ջրամբարը հիմնականում օգտագործվում էր Իրանի իսլամական հանրապետությունը։
Եթե հաշվի առնենք Իրանում բնապահպանական իրավիճակը, ապա հյուսիսային շրջաններում այն իսկապես տագնապալի է՝ ջրային պաշարների կտրուկ նվազում, Ուրմիա լճի գրեթե անհետացում, եւ այս ջրամբարը ինչ-որ տեղ Իրանի հյուսիսային շրջանների համար փրկության աղբյուր է։ Թուրք- ադրբեջանական ահաբեկչական խմբերը փորձում են ինչ-որ կերպ վնաս հասցնել ջրամբարին։ Մեր բանակը, կամավորները փորձում են այս պահին թույլ չտալ, որ հակառակորդը հասնի իր նպատակին, բայց այնուամենայնիվ, սա կարեւոր թիրախ է»,-ասաց պարոն Բաբայանը։
Նա չբացառեց, որ ահաբեկչական այդ խումբը փորձելու է ինչ-որ կերպ վնասել ջրամբարը, ինչը բնապահպանական աղետ կառաջացնի՝ թիրախավորելով առաջին հերթին Իրանը․«Սա Իրանի համար կլինի տնտեսական, սոցիալական եւ բնապահպանական մեծ կորուստ»։
Կարդացեք նաև
Նելլի ԲԱԲԱՅԱՆ
