«Ոստիկանությունը ցանկացած միջոցառման դեպքում առաջնորդվում է ՀՀ օրենսդրությամբ, կատարում է կանխարգելիչ աշխատանքներ, նաեւ ապահովում բուն միջոցառման ընթացքում հասարակական կարգը»,-պատասխանելով Aravot.am-ի հարցին, ասացին ՀՀ ոստիկանության լրատվական ծառայությունից: Հարց էինք ուղղել՝ ինչո՞ւ նախորդ ամիս կազմակերպված հավաքներին, բողոքի ցույցերին ոստիկանությունը չէր խոչընդոտում, հիմա խոչընդոտում է: Հիշեցրինք, որ հանրահավաք հրավիրելու մասին ուղիղ եթերում հայտարարել էր նաեւ ՀՀ վարչապետ Նիկոլ Փաշինյանը:
Ոստիկանության լրատվական բաժնից նաեւ հայտնեցին, որ ոստիկանությունը յուրաքանչյուր իրավիճակում գործում է ըստ իրավիճակի:
Հիշեցնենք, որ այսօր կեսօրից լարված իրավիճակ էր Ազատության հրապարակում, որտեղ Նիկոլ Փաշինյանի հրաժարականի պահանջով հանրահավաք էին անցկացնում ընդդիմության ներկայացուցիչները: Ոստիկանությունը բերման էր ենթարկում հավաքվածներին:
Ոստիկանությունից նաեւ հետաքրքրվեցինք՝ նոյեմբերի 9-ի գիշերը կառավարության եւ ԱԺ֊ի շենք մտած ու բռնություն կատարած անձանց ձեռքը ոստիկանությունը, կարծես թե չբռնեց, նույնիսկ այն պահին, երբ դաժան ծեծի էին ենթարկում Արարատ Միրզոյանին: Այսօր բռնության դրսեւորումներ ու կոչեր չկան, բայց բերման են ենթարկում մարդկանց: Ի պատասխան, ոստիկանության լրատվական ծառայությունից ասացին. «Ոստիկանությունն այդ օրն էլ ներկա է եղել եւ ըստ եղած հնարավոր ուժերի իրականացրել իր գործառույթները: Ձեր կողմից նշված դեպքերում կան հարուցված քրեական գործեր, բերման ենթարկվածներ ու ձերբակալվածներ»:
Կարդացեք նաև
Լուսինե ԲՈՒԴԱՂՅԱՆ
