Այսօր ժամը 13-ին, ինչպես հայտնի է, հանրահավաք էրկազմակերպվել Ազատության հրապարակում՝ Արցախի հողերը հանձնելու Ալիեւ-Փաշինյան-Պուտին պայմանագիրը չեղյալ հայտարարելու պահանջով: Սակայն ոստիկանությունը, ԱԱԾ-ն Ազատության հրապարակում հավաքվողներին բերման է ենթարկում բաժիններ:
Քիչ առաջ ձերբակալվեց նաեւ Արցախի նախկին օմբուդսմեն, իրավապաշտպան Ռուբեն Մելիքյանը: Նա ուղիղ եթերում հայտարարեց. «Պատերազմի օրերին հավաքներ էին կազմակերպվում ՄԱԿ-ի, միջազգային կառույցների գրասենյակների, դեսպանատների մոտ, ռազմական դրության ժամանակ չէին խոչընդոտում, պատերազմն ավարտվել է ու ոստիկանությունը խոչընդոտում է քաղաքացիներին ու պաշտպանում է հող հանձնող դավաճաններին»:
Ռուբեն Մելիքյանին ձերբակալելիս ասացին, որ չթույլատրված հավաքի է մասնակցում: Նա ասաց. «Ուրեմն ձերբակալեք: Ինձ ձերբակալեցին դավաճանի պաշտպանները, այն մարդիկ, որոնք մեր զինվորներին, ընկերներին սպանեցին ու որեւէ զինվորական պատվով չհուղարկավորեցին Շուշի քաղաքում, հիմա ինձ ձերբակալում են: Ես շնորհակալ եմ, որ ինձ ձերբակալում են, ինձ լավ եմ զգում մի փոքր, որովհետեւ շատ դժվար է դիմանալ այս անպատվությանը»:
Ըստ Ռուբեն Մելիքյանի, Նիկոլ Փաշինյանը երկու օր առաջ խոստացել էր վրեժ լուծել ու սա իր վրեժի դրսեւորումն է:
Կարդացեք նաև
Ռուբեն Մելիքյանին տարան Կենտրոնի ոստիկանություն:
Հռիփսիմե ՋԵԲԵՋՅԱՆ
Լուսանկարը՝ արխիվային
