Aravot.am-ի տեղեկություններով, այն մարդը, որ փոխարինելու է ԿԳՄՍ նախարար Արայիկ Հարությունյանին, ԵՊՀ Ինֆորմատիկայի եւ կիրառական մաթեմատիկայի ֆակուլտետի դեկան, ֆիզիկամաթեմատիկական գիտությունների դոկտոր, պրոֆեսոր Վահրամ Դումանյանն է, որը համարվում է նաեւ ԿԳՄՍ նախարարության ֆավորիտը եւ ժամանակին նաեւ ռեկտորի թեկնածու էր:
Aravot.am-ը պարոն Դումանյանից հետաքրքրվեց՝ իրեն առաջարկվե՞լ է ԿԳՄՍ նախարարի պաշտոնը, հնարավո՞ր է արդեն նշանակվել է, քանի որ ըստ որոշ տեղեկությունների` Արայիկ Հարությունյանը քանի օր է՝ հրաժարական է տվել, սակայն դա գաղտնի է պահվում, իսկ ԿԳՄՍ նախարարությունից հերքում են, մինչեւ նա իր հարցերը լուծի: Վահրամ Դումանյանն ասաց, որ այս բարդ իրավիճակում չի ցանկանում որեւէ հարցի պատասխանել. «Հիմա ի վիճակի չեմ հարցերի պատասխանել»:
Խնդրեցինք՝ մեկ բառով հաստատել կամ հերքել՝ ի՞նքն է արդյոք նախարարի թեկնածուն: «Չգիտեմ, չեմ կարող պատասխանել…Ինձ մոտ մարդիկ կան հիմա, չեմ կարող խոսել»,-ասաց նա:
Հարցրինք՝ արդյոք իր վրա ընտրության կանգ առնելը պայմանավորված էր նրանով, որ ինքը մեկն է այն 5 անձանցից, որոնք դեմ են քվեարկել ԵՊՀ գիտխորհրդի՝ Նիկոլ Փաշինյանի հրաժարականի մասին հայտարարությանը: Մեր զրուցակիցը հետեւյալ կերպ պատասխանեց. «Այդ մեկը հաստատ չէ, այդ մեկը բացառված է, նման բան գոյություն չունի: Այսինքն` մի հատ քվեարկելու համար նման բա՞ն է լինում: Այս բարդ պրոցեսների մեջ պետք չէ նման հարց տալ»:
Կարդացեք նաև
Գոհար ՀԱԿՈԲՅԱՆ
