«Ազգային օրակարգ» կուսակցության խորհրդի նախագահ Արա Հակոբյանը այսօր Հանրապետության հրապարակում վարչապետ Նիկոլ Փաշինյանի հրաժարականի պահանջով հանրահավաքի ժամանակ իր ելույթում ասաց, որ չկա անվտանգություն, ազատություն արդարություն. «Ի՞նչ արդարություն: Երբ որ գալիս էր Նիկոլ Փաշինյանը, ասում էր՝ արդար է լինելու, կոռուպցիայի դեմ պայքար է լինելու, մենք վերցնելու ենք այն փողերը, որոնք գողացվել են երկրից ու պետությունից ու դրանով բարեկեցություն ենք ապահովելու ձեզ՝ ժողովրդին: Ասում են՝ 100 մլն դոլար վերցրել են այսպես կոչված կոռուպցիոն գործերից: Բայց դրանից ավելի իրենց պարգեւավճար են վերցրել: Եթե մարդկանց թոշակները 5-10 հազար դրամ են բարձրացնում, իրենց աշխատավարձերը՝ 3-4 անգամ են բարձրացրել: Դա՞ է արդարությունը, մենք դա՞ էինք իրենցից սպասում»:
Նա վստահեցրեց, որ Նիկոլ Փաշինյանը վախեցած է. «Նա նույնիսկ եկեղեցի է թիկնապահներով մտնում: Որպեսզի մեր երկիրը ապագա ունենա, զարգացում ունենա, որպեսզի մեր երկրում լինի արդարություն, մի նախապայման կա՝ Նիկոլ Փաշինյանը իր խմբով պետք է հեռանա, կամ նրանց պետք է հեռացնենք»:
Հռիփսիմե ՋԵԲԵՋՅԱՆ
