Արցախյան երկրորդ պատերազմի հենց առաջին օրերից Եռաբլուրում ամեն օր տասնյակից ավելի հուղարկավորություններ են կատարվում:
Դա շարունակվում է նաեւ այսօր, ու վերջը դեռ չի երեւում:
Շտապ օգնության բրիգադներն ամեն օր այստեղ հերթապահություն են իրականացնում: Յոթերորդ ենթակայանից հերթապահող բուժակ Նարեկ Զախարյանն Aravot.am-ին ասաց, որ Ամանորի առաջին օրը թաղումներ նախատեսված չեն:
Այսօր ինքնահողի արարողություններ են լինելու:
Կարդացեք նաև
Նա պատմեց, որ որքան էլ ծանր է, իրենք իրենց պարտականությունն են կատարում: «Ողբերգության չափերն ահավոր են: Մենք այստեղ ենք, որպեսզի հուղարկավորությունների ժամանակ հերոսների հարազատներին անհրաժեշտության դեպքում առաջին բուժօգնություն ցույց տանք: Ամենածանրը պատերազմի առաջին օրերն էին, երբ օրական 15-ից ավելի հուղարկավորություն էր լինում: Մենք սկզբում վիրավորներին էինք տեղափոխում: Մտածում էի, թե որքան ծանր էր: Բայց այստեղ ամեն օր որդեկորույս մայրերի վիշտը տեսնելը անտանելի է: Մանավանդ, երբ հաճախակի ես ստիպված լինում շտապ կարգով առաջին բուժօգնություն ցույց տալ: Բայց ի՜նչ արած: Սա է իրականությունը: Եվ մենք մեր մասնագիտական պարտքը կատարում ենք»,-ասաց նա:
Աշոտ ՀԱԿՈԲՅԱՆ
