Այս տարբերակով պատրաստված հավիկը ոչ միայն շատ համեղ է, այլեւ շատ գրավիչ տեսք ունի, եւ երեխաների սիրելի ուտեստներից է: Ընդամենը 0,5 կգ կրծքամսից, 1 գլուխ սոխից եւ 1 թարմ պղպեղից կարելի է ստանալ 4-5 հոգու համար թեթեւ ընթրիք: Եթե կողքը նաեւ խաշած բրինձ կամ տապակած կարտոֆիլ դնեք՝ հրաշալի ճաշ կդառնա:
Անհրաժեշտ մթերքները
Հավի կրծքամիս- 0,5կգ
Աղ, սեւ եւ կարմիր պղպեղ
Կարդացեք նաև
Թարմ կարմիր պղպեղ- 1 հատ (կարող եք վերցնել կես հատ կարմիր, կես հատ դեղին պղպեղ)
Գլուխ սոխ- 1 հատ
Սունկ-10 հատ (պարտադիր չէ)
Պատրաստման եղանակը
Հավի կրծամիսը լավ լվանալ, չորացնել: Եթե ոսկորով է, ապա ոսկորն ու կաշին հանեք, դրանից հետո կարող եք հավի արգանակ կամ ապուր պատրաստել:
Ֆիլեն կտրատեք փոքրիկ խորհանարդիկների, համեմեք աղով, կարմիր եւ սեւ պղպեղով: Կարող եք ըստ ճաշակի նաեւ չորացրած կանաչի, քերած սխտոր կամ սխտորի փոշի ավելացնել: Դրեք սառնարանը՝ համեմվի: Կարող է մնալ 1 ժամից մինչեւ մեկ օր:
Բամբուկի 8-10 հատիկ փայտիկ դրեք ջրով լցված երկար բաժակի կամ տափակ եւ երկար ամանի մեջ, որ լավ թրջվեն:
Լավ լվացեք նաեւ սունկը, պղպեղները, մաքրած սոխը: Դրանք նույնպես կտրատեք հավի կտորների չափով:
Փայտիկի վրա հավաքեք բանջարեղենի եւ հավի կտորները՝ իրար հաջորդելով:
Եթե բուսակների համար եք պատրաստում՝ հավի փոխարեն կարող եք սունկ կամ դդմիկ դնել:
Բանջարեղենով եւ հավով շարված փայտիկների վրա բուսական յուղ ցողեք, մի թեթեւ աղ եւ պղպեղ արեք՝ բանջարեղենի համար եւ դրեք նախապես 200 աստիճան տաքացված ջեռոցը՝ 15-20 րոպեով: Կամ, եթե ունեք գրիլ թավա, կարող եք տապակել գրիլ թավայի վրա՝ պարբերաբար շուռումուռ տալով: Գրիլի վրա պատրաստելու տարբերակը կարող եք մանրամասն կարդալ այստեղ:
Արագ եւ համեղ ընթրիքը պատրաստ է:
Բարի ախորժակ:
Պատրաստման մանրամասները՝ տեսանյութում:
Պատրաստեց Մելանյա ԲԱՐՍԵՂՅԱՆԸ
