«Այո, ռազմական դրությունը չէր հանվում մի պատճառով՝ մտավախություն կար, որ ընդդիմությունը նախաձեռնելու է Փաշինյանին անվստահություն հայտնելու գործընթացը։ Կհաջողեինք, թե ոչ, կերեւար նախաձեռնության ժամանակ։ Չկա ռազմական դրությունը պահպանելու քաղաքական-իրավական հիմնավորում»,-ԱԺ լիագումար նիստում այսօր հայտարարեց «Բարգավաճ Հայաստան» խմբակցության պատգամավոր Նաիրա Զոհրաբյանը։
Հիշեցնենք, որ քննարկվում է «Լուսավոր Հայաստանի» եւ «Բարգավաճ Հայաստանի» ներկայացրած՝ ՀՀ-ում ռազմական դրության ռեժիմը վերացնելու առաջարկը։
Նաիրա Զոհրաբյանը նշեց․ «Առանց ռազմական դրությունը հանելու՝ չենք կարող սկսել ԱԺ լուծարման գործընթացը։ Ահա, միայն դրանից ելնելով՝ կողմ քվեարկեք։ Այլեւս սկսված է ընտրություններին նախապատրաստվելու ռեժիմը, եւ ներկայացնեմ մի քանի ահազանգ։ Դատապարտյալների եւ կալանավորների հարազատներից ստացել եմ ահազանգեր, որ դատապարտյալների հիվանդանոցի փոխտնօրենը, «Նուբարաշեն»-ից Գեւորգ Վարոսյանը, «Արմավիր» ՔԿՀ-ից տարբեր աշխատակիցներ հանդիպում են կալանավորների հետ եւ ասում՝ գիտեք, չէ՞՝ ում պիտի ընտրեք, չընտրեցիք՝ խնդիրներ կունենաք»։
Նաիրա Զոհրաբյանը նաեւ ուշադրություն հրավիրեց այն հանգամանքի վրա, որ ԿԸՀ կայքում չկա ընտրողների ցուցակը՝ «տեխնիկական վերազինման» պատճառաբանությամբ։
Կարդացեք նաև
Լուիզա ՍՈՒՔԻԱՍՅԱՆ
