ԿԳՄՍ նախարարի տեղակալ Ժաննա Անդրեասյանը «Արմենպրեսի» մամուլի սրահում անդրադարձավ ուսուցիչների ատեստավորմանը: «Այս տարի արդեն իրականացնում ենք սեփական նախաձեռնությամբ կամ կամավոր ատեստավորման գործընթաց, որը վերաբերում է 7-12-րդ դասարաններում հայոց լեզու, հայ գրականություն, հանրահաշիվ, երկրաչափություն, քիմիա, ֆիզիկա, կենսաբանություն, աշխարհագրություն առարկաներ դասավանդողներին: Բոլոր այս առարկաները դասավանդող ուսուցիչները 7-12-րդ դասարաններում ունեն հնարավորություն դիմել ԿԳՄՍ նախարարություն: Մայիսի 3-ից արդեն սկսել ենք դիմումների ընդունման գործընթացը: Կամավոր ատեստավորման գործընթացն իրենից ներկայացնում է գիտելիքների ստուգում` դրա արդյունքում աշխատավարձի հավելավճարի հնարավորության ընձեռում, կախված այն արդյունքից, որը կցուցաբերի ուսուցիչը»:
Նախարարի տեղակալն ասաց, որ դիմելու գործընթացը բավականին հեշտացվել է, եւ որեւէ ավելորդ փաստաթուղթ չի պահանջվում, ընդամենը պետք է ներկայացնել դիմում, տեղեկանք դպրոցից եւ դիպլոմի պատճենը: Նա հավելեց, որ այդ փաստաթղթերը կարելի է ինչպես առձեռն բերել, այնպես էլ էլեկտրոնային փոստով ուղարկել ԿԳՄՍ նախարարություն: Դիմումներն ընդունվելու են մինչեւ մայիսի 31-ը:
«Կախված դիմումների թվից` մենք ԳԹԿ-ի միջոցով պլանավորելու ենք կազմակերպման գործընթացը: Մինչեւ օգոստոսի 20-ը կհրապարակվի գիտելիքների ստուգման օրերի ժամանակացույցը, որով ուսուցիչները կտեղեկանան, թե կոնկրետ առարկայից որ օրերին է կազմակերպվելու գիտելիքների ստուգումը:
Կախված դիմումների թվից` որոշում կկայացվի եւ Երեւանում, եւ մարզերում գիտելիքների ստուգման կենտրոններ ունենալու մասին: Նախատեսում ենք, որ սեպտեմբերին կիրականացվի գիտելիքների ստուգման գործընթացը, որի արդյունքներով այն ուսուցիչները, որոնք կցուցաբերեն 80-90 տոկոս արդյունք կստանան աշխատավարձի 30 տոկոսի չափով հավելավճար, իսկ նրանք, որոնք կցուցաբերեն 90 տոկոս եւ ավել արդյունք, կստանան աշխատավարձի 50 տոկոսի չափով հավելավճար»,-նշեց նախարարի տեղակալը:
Կարդացեք նաև
Գոհար ՀԱԿՈԲՅԱՆ
