Հունիսի 9-ին Վլադիմիր Վարդանյանի նախագահությամբ կայացավ ԱԺ պետական-իրավական հարցերի մշտական հանձնաժողովի հերթական նիստը:
Անկախ պատգամավորներ Սոֆիա Հովսեփյանը, Թագուհի Թովմասյանը, Գոռ Գեւորգյանը հեղինակել են ««Ազգային ժողովի կանոնակարգ» սահմանադրական օրենքում փոփոխություն եւ լրացում կատարելու մասին» օրենքի նախագիծը:
Հիմնական զեկուցող Սոֆիա Հովսեփյանը նշեց, որ առաջարկվում է սահմանել պարտադիր պահանջ Կառավարության անդամների համար՝ ԱԺ-Կառավարություն հարցուպատասխանի ժամանակ պարտադիր մոտենալ ԱԺ ամբիոնին եւ բանավոր պատասխանել պատգամավորների հարցերին կամ բանավոր ներկայացնել հիմնավորում՝ պատգամավորների հարցերին բանավոր չպատասխանելու պատճառների մասին: Նրա խոսքով՝ ակնկալվում է մեծացնել խորհրդարանական վերահսկողության իրականացման արդյունավետությունը:
Նշվեց, որ լինում են դեպքեր, երբ Կառավարության անդամները, գտնվելով ԱԺ նիստերի դահլիճում, բանավոր չեն պատասխանում պատգամավորների հարցերին՝ փոխարենը նիստը վարողի միջոցով առաջարկելով հարցը ներկայացնել գրավոր:
Կարդացեք նաև
ՀՀ արդարադատության նախարարի տեղակալ Սուրեն Գրիգորյանը տեղեկացրեց, որ Կառավարությունն օրենքի նախագծի վերաբերյալ ունի բացասական դիրքորոշում: Փոխնախարարի խոսքով՝ խնդիրը հայեցակարգային մակարդակում է: Նշվեց, որ պատգամավորը պետք է շահագրգիռ լինի իր հարցի բովանդակային պատասխանը ստանալու հարցում:
Հանձնաժողովի նախագահ Վլադիմիր Վարդանյանի խոսքով՝ «ԱԺ կանոնակարգ» օրենքը չի կարող կարգավորել մի հարց, որը վերաբերում է Կառավարության անդամների լիազորություններին. «Չես կարող պարտավորություն նախատեսել Կառավարության անդամի համար, որովհետեւ դա խնդրահարույց կլինի սահմանադրականության տեսանկյունից»: Նշվեց, որ օրինագիծը թերի է թե՛ քաղաքական, թե՛ իրավական ու թե՛ օրենսդրական տեխնիկայի տեսանկյուններից: Այն մշակման կարիք ունի: «Նախագիծն ընկալում եմ որպես առկա խնդիրը բարձրաձայնելու հնարավորություն»,-ասաց Վլադիմիր Վարդանյանը:
Օրենքի նախագիծը դրվեց քվեարկության եւ չարժանացավ հանձնաժողովի հավանությանը:
ՀՀ Ազգային ժողով
