«Մայիսի 12-13-ից սկսած՝ սահմանային իրավիճակի փոփոխություններ մեծ առումով չկան՝ բացառությամբ պարբերաբար գրանցվող միջադեպերը: Նման միջադեպ ունեցանք օրերս, ինչի արդյունքում մեր զինվորներից թեթեւ վիրավորում ունեցան»,-այսօր Շողակաթ համայնքում տեղի ունեցած ասուլիսում ասաց Գեղարքունիքի մարզպետ Գնել Սանոսյանը: Ասաց, որ զինվորի վիճակը կայուն է եւ այս պահին ռուս զինվորականները գտնվում են այնտեղ: Նրանք, ըստ մարզպետի, կտեղակայվեն հայ եւ ադրբեջանական զինված ուժերի փոխարեն, որից հետո կգնա բանակցային գործընթաց եւ որոշ հատվածներում կարվեն ճշգրտումներ:
Իսկ թե ինչու են ասուլիսը Շողակաթ համայնքում կազմակերպել, մարզպետի խոսքով, ասուլիսից հետո կբացեն Շառլ Ազնավուրի անվան այգին, որը կլինի ժամանցային վայր եւ համայնքի կյանքում կարեւոր դեր կունենա: Գնել Սանոսյանն ասաց, որ այգին կառուցվել է սուբվենցիոն ծրագրով: Շողակաթը խոշորացված համայնք է իր մեջ ներառում է 6 բնակավայր: Բոլոր բնակավայրերում միասին վերցրած, ըստ մարզպետի, 44 ծրագիր է իրականացվել: Ասաց նաեւ, որ Շողակաթում 6 հակակարկտային կայան է տեղադրվել:
Ըստ նրա՝ չնայած ծանր պատերազմին, տնտեսական խնդիրներին, ասֆալտապատման ծրագրերը շարունակվեցին. «Այդ աշխատանքները մոտ ժամանակներն ավարտին կհասցնենք եւ ամբողջությամբ կունենանք բոլորովին նոր ճանապարհահատված, որը ե՛ւ ռազմավարական առումով է կարեւոր ե՛ւ տուրիստական»:
Գնել Սանոսյանն ուշադրություն հրավիրեց այն փաստին, որ ճանապարհաշինության ժամանակ պետական մարմինները չեն խառնվել, չեն թալանել եւ տեղի են ունեցել նորմալ մրցույթներ, ինչի արդյունքում 2 միլիարդ 727 միլիոն դրամանոց ծրագրում խնայվել է 730 միլիոն դրամ:
Կարդացեք նաև
Լուսինե ԲՈՒԴԱՂՅԱՆ