Գեղարքունիքի մարզպետ Գնել Սանոսյանը կարծում է, որ այն համայնքապետերը, որոնք արտահերթ խորհրդարանական ընտրություններում «խայտառակ պարտություններ կրեցին իրենց համայնքներում», ինքնակամ պետք է հեռանան: Մարզպետն այս մասին ասաց մարզի Շողակաթ համայնքում կազմակերպված ասուլիսում: «Տեսեք, այդ երեւույթը ես չեմ ուզում շատ մեկնաբանել, բայց կարծում եմ՝ հետեւյալն է: Կան մարդիկ, որոնք կարծում էին, որ ընտրություններով աշխարհն ամբողջովին փոխվելու է եւ հենց իրենք իրենց համայնքում իրենց բնակիչների նկատմամբ անհասկանալի վարք էին դրսեւորում: Եվ կարծում եմ՝ այ, այդպիսի մարդիկ, որոնք վերջում խայտառակ պարտություններ կրեցին իրենց համայնքներում, էդ մարդիկ ուղղակի ինքնակամ պետք է գնան»:
Գնել Սանոսյանի խոսքով՝ «էն վարքը, որը իրենք էին դրսեւորում, այն պահվածքը, որ իրենք ունեին, եւ այն անհարգալից վերաբերմունքը, որ իրենք էին դրսեւորում իրենց համայնքի բնակչության նկատմամբ…: Ընտրությունների արդյունքով բնակչությունն իրենց կարծիքը հայտնեց, եւ այդ մարդիկ, եթե մի քիչ խորը մտածեն, իրենք ինքնակամ պետք է գնան՝ հաշվի առնելով, որ համայնքում իրենց վարկանիշը ինչպիսի վիճակում է»:
Հարցին, թե Գեղարքունիքի մարզում կա՞ն նման համայնքներ եւ համայնքապետեր, ու արդյոք մարզպետը նրանց հորդորել է հրաժարական տալ, պրն Սանոսյանը պատասխանեց. «Չունենք մենք այդպիսի պրոցես, բայց ունենք այնպիսի համայնքապետեր, որոնք եթե մի քիչ խորը մտածեն, իրենք այլեւս անելիք չունեն այդտեղ»:
Լուսինե ԲՈՒԴԱՂՅԱՆ