Շիրակի բժիշկ մարզպետ Հովհաննես Հարությունյանի հրաժարականից հետո՝ նախքան Նազելի Բաղդասարյանի Շիրակի մարզպետ նշանակվելը, աշխատանքից ազատման դիմում է ներկայացրել նաև փոխմարզպետը՝ Հովհաննես Զորաբյանը։ Նա Հովհաննես Հարությունյանի մոտ ընկերն է․ գյումրեցի է։
33-ամյա Հովհաննես Զորաբյանը ևս մասնագիտությամբ բժիշկ է, անդրադարձել ենք, որ նա անդադար կրթվում է․ Երևանի Մխիթար Հերացու անվան պետական բժշկական համալսարանի ընդհանուր բժշկության ֆակուլտետն ավարտելուց հետո մասնագիտացել է կլինիկական օրդինատուրայի «Պլաստիկ վիրաբուժություն և միկրովիրաբուժություն», այնուհետ «Համաճարակաբանություն» մասնագիտությունների մեջ։ Իսկ 2020-2021թթ.-ին սովորել է Հայաստանի պետական տնտեսագիտական համալսարանի կառավարման ֆակուլտետի «Առողջապահության կառավարում և վարչարարություն» առկա մագիստրատուրայում։
Հովհաննես Զորաբյանն աշխատել է ՀՀ Առողջապահության նախարարության «Հիվանդությունների վերահսկման և կանխարգելման ազգային կենտրոն» ՊՈԱԿ-ում՝ որպես բժիշկ-համաճարակաբան, նաև ՀՀ Պաշտպանության նախարարության տարբեր ծառայություններում։ Հաճախակի է մասնակցել Գերմանիայի Դաշնային Հանրապետությունում անցկացված դասընթացներին ու զորավարժություններին՝ որպես դաշտային հոսպիտալի բժիշկ- համաճարակաբան կամ դաշտային հոսպիտալի օպերատիվ բաժնի ղեկավար։
Կարդացեք նաև
Նա Շիրակի մարզում պաշտոնավարում է ընդամենը մեկ ամիս․ փոխմարզպետ նշանակվել էր հոկտեմբերի 5-ին, երբ մարզպետ Հովհաննես Հարությունյանն արդեն արձակուրդում էր․ որպես Գյումրու քաղաքապետի թեկնածու՝ ակտիվ քարոզարշավի մեջ էր։
Aravot.am-ը տարածքային կառավարման և ենթակառուցվածքների նախարար Գնել Սանոսյանից հետաքրքրվեց՝ արդյոք արդյունավե՞տ է ղեկավար պաշտոնի նշանակված անձանց այս արագությամբ փոխելը։
Նախարարն ասաց․ «Միգուցե շուտ-շուտ փոխելն արդյունավետ չէ, բայց մյուս կողմից էլ՝ կարծում եմ նորմալ, հանգիստ, բնական պրոցես է․ որոշակի պաշտոնյաներ, երբ որ փոխվում են, ամեն մեկն, այսպես ասած, թիմով է աշխատում, նորմալ եմ վերաբերվում։
Լրագրողները միգուցե ինչ-որ սուր բան տեսնում են, ես ոչինչ չեմ տեսնում։ Ես նույնիսկ սուր բան չեմ տեսնում, երբ ընդդիմադիրներն ընտրվում են համայնքի ղեկավար։ Նորմալ է, հարգում ենք մեր քաղաքացիների ընտրելու իրավունքը, ընտրությունը և սկսում ենք աշխատել համայնքապետերի հետ։ Նորմալ է ամեն ինչ»։
Նշենք, որ փոխմարզպետի դիմումը դեռ ստորագրված չէ։ Ինչպես տեղեկանում ենք՝ Շիրակի մարզպետարանի ֆեյսբուքյան պաշտոնական էջից՝ նա դեռ պաշտոնավարում է․ այսօր փոխմարզպետը «Գյումրի բժշկական կենտրոն» ՓԲԸ-ի տնօրեն Արմեն Իսահակյանի հետ հյուրընկալել է Հայաստանի կաթվածի գործադիր խորհրդի անդամներին, այնուհետ այցելել Գյումրու՝ վերջերս վերանորոգված ծննդատուն։
Նունե ԱՐԵՎՇԱՏՅԱՆ
Լուսանկարները՝ Շիրակի մարզպետարանի ֆեյսբուքյան էջից
