Այսօր Սահմանադրական դատարանի և Գործընկերություն հանուն լավ կառավարման ծրագրային ձևաչափի շրջանակներում ֆինանսավորվող և Եվրոպայի խորհրդի կողմից իրականացվող «Աջակցություն դատական բարեփոխումների իրականացմանը` Հայաստանում դատական իշխանության անկախության և արհեստավարժության ամրապնդումը» ծրագրի կողմից կազմակերպվել էր համատեղ միջոցառում՝ նվիրված Սահմանադրական դատարանի նոր վեբկայքի գործարկմանը և Հայաստանի Հանրապետության Սահմանադրական դատարանի հիմնադրման 26-ամյակին։
Միջոցառմանը ներկա էին Հայաստանի Հանրապետությունում Եվրոպական միության պատվիրակության ղեկավար, դեսպան Անդրեա Վիկտորինը, Երևանում Եվրոպայի խորհրդի գրասենյակի ղեկավար Մարտինա Շմիդտը և Եվրոպայի խորհրդի Մարդու իրավունքների և իրավունքի գերակայության գլխավոր տնօրինության մարդու իրավունքների իրականացման, արդարադատության ու իրավական համագործակցության չափանիշների վարչության համագործակցության ծրագրերի բաժնի ղեկավարի տեղակալ Լիլիթ Դանեղյանը։ Միջոցառմանը մասնակցում էին գործադիր, օրենսդիր և դատական իշխանության ներկայացուցիչներ, Հայաստանի Հանրապետությունում հավատարմագրված դիվանագիտական առաքելությունների ղեկավարներ և քաղաքացիական հասարակության ներկայացուցիչներ:
«Եվրոպական միությունն ընդունում է վերջին տարիներին Հայաստանի կողմից գործադրվող ջանքերը երկրում ժողովրդավարական գործընթացներն առաջ մղելու ուղղությամբ։ Ողջունելի է նաև, որ քաղաքական ղեկավարությունը հանձնառու է սկսել Սահմանադրական բարեփոխումներ, ինչպես նախատեսված է Դատաիրավական բարեփոխումների 2019-2023 թվականների ռազմավարությամբ՝ վերջերս ստեղծված Սահմանադրական խորհրդի և Սահմանադրական հանձնաժողովի միջոցով»,- իր խոսքում նշեց դեսպան Վիկտորինը:
Կարդացեք նաև
ՀՀ-ում ԵՄ գրասենյակ
