«Պարոն Կոնջորյան, ձեր այսօրվա ելույթը նայեք եւ մտածեք՝ դուք դրանով նպաստեցի՞ք ՀՀ-ում քաղաքական համակարգի բարելավմանը, թե հարված հասցրիք։ Մենք ասել ենք՝ եթե նախագահի կարգավիճակը վերկուսակցական եւ համազգային համախմբման գործառույթ ունի, ապա ինչո՞ւ է իշխող ուժն անտեսում հանրությանն ու ընդդիմությանը եւ որոշում, որ իր քաղաքական թիմի անձին պետք է ներկայացնի»,-ԱԺ լիագումար նիստում այսօր անդրադառնալով նախագահի պաշտոնում Վահագն Խաչատրյանի ընտրության հարցի ժամանակ ընդդիմության ուղղված ՔՊ-ական պատգամավոր Հայկ Կոնջորյանի մեղադրանքներին՝ ասաց «Հայաստան» դաշինքի պատգամավոր Արծվիկ Մինասյանը։
Նա դիմեց իշխող ուժին․ «Որոշել եք՝ վայելեք․ ձեր՝ ՔՊ-ի նախագահն է»։ Մինասյանը նաեւ հայտնեց, որ նախագահի՝ առաջիկայում ԱԺ-ում սպասվելիք երդմնակալության հարցով հատուկ նիստին չի մասնակցելու «Հայաստան» խմբակցությունը։
Լուիզա ՍՈՒՔԻԱՍՅԱՆ
