Բուդապեշտում մեկնարկած Գրեփլինգի Եվրոպայի առաջնությունում այսօր պայքարի մեջ մտել էին no gi (առանց կիմոնոյի) մրցաձեւի ներկայացուցիչները:
Ընդամենը մեկ տարի առաջ հիմնադրված Հայաստանի գրեփլինգի ֆեդերացիան այս ձեւում հայտավորել էր երեք մարզիկի՝ 62 կգ քաշայիններ Ռազմիկ Միսակյանին, Մայիս Ներսեսյանին եւ 84 կգ քաշային Արթուր Զաքարյանին: Ու չնայած դեռեւս բավարար մրցափորձի պակասին, մեր հավաքականը մեկ արծաթե մեդալ նվաճեց: 62 կգ քաշային Ռազմիկ Միսակյանը որակավորման փուլում հաղթեց ադրբեջանցի մրցակցին, քառորդ եզրափակչում՝ ռումինացուն, կիսաեզրափակչում՝ լեհին ու ոսկու համար գոտեմարտեց անչափ ուժեղ իսրայելացի Օմրի Հավիվի հետ եւ մարտը տանուլ տվեց՝ բավարարվելով Եվրոպայի առաջնության արծաթե մեդալով:
Բրոնզե մեդալի կարող էր հավակնել նաեւ Արթուր Զաքարյանը, եթե սփոփիչ գոտեմարտում հաղթահարեր ֆրանսիացու արգելքը:
Հայաստանի գրեփլինգի ֆեդերացիայի գլխավոր քարտուղար Վլադիմիր Հովհաննիսյանը մրցավայրից Aravot.am-ին տեղեկացրեց, որ հավաքականի ցույց տված արդյունքը բավարար է, թեեւ տղաները կարող էին ավելիին էլ հասնել: Վաղը տրվելու է gi (կիմոնոյով) մրցաձեւի մեկնարկը, որտեղ եւս մեդալ նվաճելու հեռանկար կա:
Կարդացեք նաև
Աշոտ ՀԱԿՈԲՅԱՆ
