«Դիմադրության» շարժման հանրահավաքն այսօր սկսվեց 1 րոպե լռությամբ հարգելով այսօր սրտի կաթվածից մահացած ցուցարարի հիշատակը: Չնայած Երեւանի քաղաքապետարանը վստահեցնում է, որ շտապօգնության մեքենան տեղում է եղել 7 րոպե անց, ԱԺ փոխխոսնակ, «Հայաստան» խմբակցության պատգամավոր Իշխան Սաղաթելյանը հայտարարեց. «Քաղաքացին մահացել է, որովհետեւ տարածքում նաեւ շտապօգնության մեքենա չկար: Այս տարածքում բազմաթիվ անվտանգության աշխատակիցներ, ոստիկաններ կան, բայց տարրական շտապօգնության մեքենա չեն ապահովում օրվա իշխանությունները»:
Նա պահանջեց, որ այս պահից սկսած՝ տարածքում մշտապես լինի շտապօգնության մեքենա. «Քաղաքացին դուրս է եկել պայքարի, իր կյանքի վերջին ժամերն անցկացրել է այս հրապարակում: Մենք պայքարի ենք դուրս եկել ու գիտենք ինչի համար, ինչ նպատակով, ժողովրդի կամքը անկասելի է»:
Նա ասաց, որ այսօր առավոտվանից ՀՀ տարբեր քաղաքներում, մայրաքաղաքում փակ են եղել բազմաթիվ ճանապարհներ, փողոցներ. «Մեր մարզային բնակիչները փակ են պահել Երեւան-Արտաշատ մայրուղին, Գեղարքունիքի մարզի Սեւան-Երեւան մայրուղին, Մարտունի-Գավառ մայրուղին, Կոտայքի մարզի Երեւան-Աշտարակ խճուղին, Արագածոտնի մարզում տեղի է ունեցել ավտոերթ, Սյունիքի մարզի Կապան քաղաքում եղել է ավտոերթ: Այս պահին փակ է Երեւան-Իջեւան միջպետական ճանապարհը: Առավոտվանից Երեւանի տարբեր փողոցներում մեր հայրենակիցները, մենք բոլորս սկսել եւ շարունակել ենք անհնազանդության ցույցերը: Որքան էլ ոստիկանությունը պնդի, թե փողոցները բաց են, բայց դուք տեսաք, թե ամբողջ օրը ինչ է կատարվում քաղաքում: Իրոք, ժողովուրդը ոտքի է կանգնել, մեր պահանջը հստակ է, հանրային պահանջը՝ ձեւավորված»:
Իշխան Սաղաթելյանն առաջարկեց Սայաթ-Նովա փողոցով սկսել անհնազանդության երթ, հետո վերադառնալ հրապարակ, նոր ելույթներ ունենալ. «Կարեւոր ասելիք ունենք ձեզ մեր վաղվա եւ առաջիկա օրերի հետ կապված»:
Կարդացեք նաև
Հռիփսիմե ՋԵԲԵՋՅԱՆ