«Նիկոլ, վարչապետ». այս վանկարկումներով այսօր դերասան Գնել Սարգսյանի հանրահավաքին հայտարարվեց, որ պետք է հասարակական շարժում ստեղծվի, որը պետք է վերահսկի հանրային, պետական մարմինների աշխատանքը:
Ցուցարարներից մեկը բղավում էր, թե ինչո՞ւ նախկին նախագահը թողեց Ղարաբաղն ու եկավ այստեղ. «Թողել է իր ժողովրդին Ղարաբաղ, եկավ այստեղ թալանեց, թող մնար այնտեղ: Հերիք է, ժողովուրդ, ոտքի կանգնենք, վռնդենք»: Մյուսները հակադարձում էին, թե՝ «մենք ընտրություններով արդեն վռնդել ենք»:
Մի մեծահասակ մարդ դժգոհում էր ընդդիմադիրների պահվածքից. «Լոմը վերցրել, ասֆալտը քանդում, դրոշակ է տնկում: Քո հերն ու մե՞րն են դրել այդ ասֆալտը, հլը ասում են՝ սո՞ւս մնանք, արա՛, սիրտս ցավում է, ասֆա՜լտ է քանդում, ո՞վ ես դու, ա՛յ սրիկա՛: Եկել է Երեւան, Ղարաբաղ է ազատագրում: Հերիք չի՞ ամբողջ Երեւանը գնաց, հիմա էլի՞ են ուզում «ուռա» ասեն ու մնան»:
Գնել Սարգսյանն էլ ասաց, որ խնդիրներ շատ կան, ու իրենք են այդ խնդիրները լուծողը, բայց Աստված չանի, որ, օրինակ, այն, ինչ չեն արել դատարանները, իրե՛նք անեն դատարանի փոխարեն:
Կարդացեք նաև
Գնել Սարգսյանն անդրադարձավ ընդդիմադիր պատգամավորների աշխատավարձին՝ ասելով, որ ըստ ընթացակարգի, եթե բացակայում են, պետք է աշխատավարձից պահումներ արվեն, բայց առավոտյան գալիս են, «իրենց թուղթը մի հատ ճտացնում են», թե ներկա են եղել, հայտարարում են, որ քաղաքական բոյկոտ է, նոր դուրս են գալիս: Հավաքված կանայք բղավում էին, թե՝ «բոյկոտի փողերը թող հանեն», մեկ ուրիշն էլ պահանջում էր՝ «հեռացնե՛լ թալանչի պատգամավորներին, մենք չենք վճարելու նրանց»:
Գնել Սարգսյանն էլ լուսավորեց նրանց. «Ոչ մի քաղաքական ուժ մեկ այլ քաղաքական ուժի չի կարող հեռացնել, ժողովուրդն է ընտրել, լավ է, վատ է՝ դա է: Մենք այն հանրությունն ենք, որ մեզ մոտ հնարավոր դարձավ, որ Ռոբերտ Քոչարյանի ու Սերժ Սարգսյանի խմբավորումները դարձյալ գան ԱԺ, եկեք մենք իրականության հետ հաշտվենք»:
Հավաքի վերջում պայմանավորվեցին ամեն ամսվա առաջին շաբաթ օրը այսպիսի հանրահավաքներ անել:
Հռիփսիմե ՋԵԲԵՋՅԱՆ
Լուսանկարը՝ Նարեկ ԱՎԱԳՅԱՆԻ
