Տավուշի թեմի առաջնորդարանում մայիսի 30-ին կայացավ ծննդով այգեպարցի՝ գրող Գայանե Փայտյանի «Ասպրամ» գրքի շնորհանդեսը։
Հեղինակի անունը հայ ընթերցողին հայտնի է «Քոչ» և «Ծալված ստվեր» գրքերով։
Գայանե Փայտյանը Aravot.am-ի հետ զրույցում նշեց, որ վեպի ոգեշնչման աղբյուրն է հանդիսացել իր հայրենի Տավուշում գտնվող Ցլիկ Ամրամի բերդը, Ասպրամի կերպարն ու նրա ունեցած ապրումները։ Ասպրամը` հայոց պատմության 10-րդ դարից հայտնի կերպարը, կնոջ ներքին դրամատիկ շղթաների անցումների մի ամբողջ համակարգ է ենթադրում։
2006թ-ից բնակություն հաստատելով Ռուսաստանում, ապրելով միայնության զգացումով, Գայանեն իրեն նույնացրել է հենց Ասպրամի հետ։ «Ասպրամ» վեպը հրատարակվել է բարերարների աջակցությամբ, գրքի շնորհանդեսին ներկա էին մտավորականներ, հյուրեր։
Կարդացեք նաև
ՀՀ վաստակավոր արտիստ Սիլվա Յուզբաշյանի ընթերցմամբ հնչեցին հատվածներ վեպից։ Շնորհավորանքի խոսքեր հղեց Տավուշի թեմի առաջնորդ Տեր Բագրատ եպիսկոպոս Գալստանյանը։ Վերջինիս իր վեպում անդրադարձել է Գայանե Փայտյանը։ Հավելենք, որ վեպը խմբագրել է բանաստեղծ Խաչիկ Մանուկյանը, տպագրությունն իրականացրել է «ԱՐՄԱՎ» հրատարակչությունը։
Լիա ՃԱՂԱՐՅԱՆ
