«Օրեր առաջ, երբ հրապարակվեց այդ խայտառակ ձայնագրությունը Գագիկ Ջհանգիրյանի մասնակցությամբ, որը իրավականում ոչ թե դատավորի, իրավաբան գիտականի խոսույթ էր, այլ ավելի շատ քրեական ենթամշակույթի ներկայացուցչի, ում հետ խոսել եմ՝ մասնագիտական հանրույթից մինչեւ մեր գաղափարակից ընկերները, ասում էին՝ նա հրաժարական չի տալու: Դրանից հետո ասում էին՝ հենա տեսնում եք՝ Նիկոլ Փաշինյանն ու իր ՔՊ-ն ամեն ձեւ իրեն պաշտպանում են իրեն, նա գնացողը չի: Ես մի պատասխան էի տալիս, ասում էի՝ եթե ժողովուրդը ոտքի կանգնած չլիներ, զարթնած չլիներ, չէր գնա»,-ընդդիմության հանրահավաքի ժամանակ անդրադառնալով Գագիկ Ջհանգիրյանի՝ ԲԴԽ անդամի պաշտոնից հրաժարականին, ասաց ԱԺ պատգամավոր Արամ Վարդեւանյանը:
«Դա ձեր շնորհքն է, որ հրաժարական է տվել: Ժողովուրդ ջան, ընկերներիցս մեկը լավ ձեւակերպում օգտագործեց, ասաց՝ սա դատական համակարգի դեօկուպացիան էր: Ու քայլ առ քայլ առանց հոգնելու, առանց նահանջելու այսպես գնալու ենք մինչեւ վերջ, այդպես ենք պայմանավորվել, ոնց չէիք հավատում, որ Գագիկ Ջհանգիրյանը կարող է հրաժարական տալ, դե իմացեք, շարքը շարունակվելու է, պայմանավորվել ենք չէ՞, սա պայքար է…»,-ասաց Արամ Վարդեւանյանը:
Գոհար ՀԱԿՈԲՅԱՆ
