«Համախմբում» նախաձեռնության անդամ Ավետիք Չալաբյանը ևս 15 օր կմնա կալանքի տակ: Քիչ առաջ նման որոշում կայացրեց դատավոր Արուսյակ Ալեքսանյանը:
Ավետիք Չալաբյանի կալանքի ժամկետը երկարացնելու մասին նախաքննական մարմնի միջնորդությունը բավարարվեց, որպեսզի վարույթ իրականացնող մարմինը ժամանակ ունենա «գործը դատարան ուղարկելու» համար:
Հիշեցնենք, օրերս ՀՀ քննչական կոմիտեն հայտարարեց, որ Ավետիք Չալաբյանի գործով նախաքննությունն ավարտվել է: Երկու օր անց դատախազությունն Ավետիք Չալաբյանի գործի նյութերը վերադարձրեց նախաքննության մարմնին ու նոր միջնորդություն ներկայացրեց կալանքը երկարացնելու վերաբերյալ։
«Քննիչն իր բերանով երեկ հաստատեց, որ Ավետիք Չալաբյանը պետք է մնա կալանքի տակ միայն նրա համար, որ ինքն ու դատախազը հանգիստ, առանց շտապելու, գործն ուղարկեն դատարան եւ ընդունեց, որ որեւէ այլ քննչական գործողություն չունեն անելու: Ասել է թե` Ավետիք Չալաբյանը շարունակելու է գտնվել կալանքի տակ գործը դատարան ուղարկելու հիմքով»,- որոշման հրապարակումից հետո, նման ֆեյսբուքյան գրառում է կատարել Ավետիք Չալաբյանի փաստաբանական խմբի անդամ Վարազդատ Հարությունյանը:
Aravot.am-ի հետ զրույցում դատավարի այս որոշումը Վարազդատ Հարությունյանն «անօրինականության գագաթնակետ» որակեց եւ հայտարարեց, որ Ավետիք Չալաբյանը գործող իշխանությունների քաղաքական պատանդն է, իսկ դատարանները իշխանությունների կատարածուներն են:
Կարդացեք նաև
«Անձին անօրինական կալանքի տակ պահող յուրաքանչյուր պաշտոնյա պատժվելու է` նստելու ձեւով»,- ասաց պաշտպանը՝ հավելելով, որ դատավորը պիտի այնպես ապրի ու գործի, որ «չամաչի գլուխը բարձրացնել ու նայել նիստին ներկաների աչքերին»:
Հիշեցնենք, 2022թ․ մայիսի 12-ին Ավետիք Չալաբյանի նկատմամբ սկսվել է քրեական հետապնդում ՀՀ քրեական օրենսգրքի 163-րդ հոդվածի 3-րդ մասի 2-րդ կետով, որը նախատեսում է պատասխանատվություն հավաքին մասնակցելուն հարկադրելը կամ հավաքին մասնակցելու կամ հավաքին մասնակցելուց հրաժարվելու նպատակով նյութապես շահագրգռելու համար՝ կատարված երկու կամ ավելի անձանց նկատմամբ:
Նելլի ԳՐԻԳՈՐՅԱՆ
