Հոկտեմբերի 19-ին տեղի ունեցավ Մասնագիտական կրթության և ուսուցման (ՄԿՈւ) հաստատություններում հաշմանդամություն ունեցող անձանց խելամիտ հարմարեցումների վերաբերյալ օրենսդրական առաջարկությունների հանրային քննարկում։ Նախագիծը մշակվել է ԱՄՆ ՄԶԳ կողմից ֆինանսավորվող «Հայաստանում աշխատուժի զարգացման» ծրագրի շրջանակում ձևավորված փորձագիտական խմբի կողմից։
Քննարկմանը մասնակցում էին ՀՀ ԿԳՄՍ փոխնախարար Ժաննա Անդրեասյանը, ՀՀ ԱԺ աշխատանքի և սոցիալական հարցերի մշտական հանձնաժողովի նախագահ Հերիքնազ Տիգրանյանը, ինչպես նաև հաշմանդամություն ունեցող անձանց հիմնախնդիրներով զբաղվող հասարակական կազմակերպությունների անդամներ, միջազգային գործընկերներ, ՄԿՈՒ հաստատությունների և այլ շահագրգիռ կառույցների ներկայացուցիչներ։
Օրենսդրական առաջարկությունների քննարկվող փաթեթը շրջանառության մեջ է դնում հաշմանդամություն ունեցող անձանց ՄԿՈՒ հաստատություններում խելամիտ հարմարեցումների հասկացությունը։ Այն կծառայի որպես իրավական հիմք՝ Մասնագիտական կրթության և ուսուցման համակարգին հաշմանդամություն ունեցող անձանց հավասար հասանելիությանն ուղղված աջակցության հետագա մեխանիզմների մշակման համար։
Կարդացեք նաև
Այս առաջարկությունների կյանքի կոչումը հնարավորություն կտա Հաշմանդամություն ունեցող անձանց ընդհանուր հիմունքներով ստանալ կրթություն, ինչպես նաև պահանջել և ստանալ խելամիտ հարմարեցումներ՝ առանց հավելյալ վճարների: Սա կտրուկ կբարելավի ՄԿՈՒ հաստատություններում համապատասխան որակավորում և հմտություններ ձեռք բերելու վերջիններիս հնարավորությունները և կբարելավի նրանց անհատական զարգացումն ու կյանքի որակը: ՄԿՈՒ օրենքով նախատեսված պետական նպատակային ֆինանսավորմամբ` ՄԿՈՒ հաստատությունները կկարողանան կատարել հաշմանդամություն ունեցող անձանց մասնագիտական կրթության և ուսուցման արդյունավետության և ներառականության բարձրացմանն ուղղված խելամիտ հարմարեցումներ՝ ինչպես ֆիզիկական, այնպես էլ բովանդակային առումով:
Օրենսդրական առաջարկությունների փաթեթը ներկայացվեց «Հայաստանում աշխատուժի զարգացման» ծրագրի արտաքին փորձագետ Մուշեղ Հովսեփյանի կողմից, որին հաջորդեց ակտիվ քննարկում և հարցուպատասխան: Միջոցառումը շահագրգիռ կողմերի համար ծառայեց որպես արդյունավետ հարթակ՝ քննարկելու առաջարկվող փաթեթի հիմնական դրույթները, ինչպես նաև համաձայնեցնելու դրա ընդունմանն ուղղված հաջորդ քայլերը:
ԱՄՆ ՄԶԳ-ի կողմից ֆինանսավորվող «Հայաստանում աշխատուժի զարգացման» ծրագիրը մեծապես կարևորում է կրթությանը և աշխատաշուկային հավասար հասանելիության ապահովման խնդիրները հաշմանդամություն ունեցող անձանց համար: Այս առումով, ՄԿՈՒ հաստատություններում խելամիտ հարմարեցումների հասկացությունը, որն առաջարկվում է սույն օրենքի նախագծով և նախատեսված է լրացնել ՄԿՈՒ օրենքի այլ դրույթները, կխթանի հաշմանդամություն ունեցող անձանց կրթություն ստանալու հնարավորությունները:
Ծրագրի մասին
«Հայաստանում աշխատուժի զարգացման» ծրագիրը հնգամյա ծրագիր է, որը ֆինանսավորվում է ԱՄՆ միջազգային զարգացման գործակալության կողմից և իրականացվում է «Ձեռնարկությունների ինկուբատոր» հիմնադրամի և կոնսորցիումի գործընկերների՝ Հայաստանի ազգային ագրարային համալսարանի, Հայ օգնության ֆոնդի և ՍԻՎԻՏՏԱ Հայաստանի կողմից։ Ծրագիրը նպատակ ունի ՀՀ բոլոր մարզերից 15-29 տարեկան 10000 երիտասարդի զինել աշխատաշուկայում պահանջարկ վայելող աշխատանքային հմտություններով։
Ծրագիրը մեկնարկել է 2021թ-ի հոկտեմբերին՝ նպատակ ունենալով ընդլայնել երիտասարդների, կանանց և հաշմանդամություն ունեցող անձանց աշխատանքային հմտությունների զարգացման հնարավորությունները, համապատասխանեցնել դրանք աշխատաշուկայի պահանջներին, ինչպես նաև խթանել նրանց ներգրավվածությանը բարձր տեխնոլոգիաների, գյուղատնտեսության և հյուրընկալության ոլորտներում։
Ծրագրի շրջանակում, մասնավորապես, նախատեսվում է պետական, կրթական ու մասնավոր հատվածների հետ համագործակցությամբ բարձրացնել հաշմանդամություն ունեցող անձանց մրցունակությունը՝ փոխելով հասարակության կարծրատիպերը և հանդես գալով քաղաքականության բարեփոխումների առաջարկներով։ Ծրագիրը կարձագանքի երիտասարդների, կանանց և հաշմանդամություն ունեցող անձանց կարիքներին և կհզորացնի նրանց կարողությունները մասնագիտական աճի և զբաղվածության համար նախատեսված ռեսուրսների և ծառայությունների հասանելիության բարձրացման միջոցով։
«Ձեռնարկությունների ինկուբատոր» հիմնադրամ
