Թեև «Բարսելոնա»-ի համար դեռևս մաթեմատիկորեն հնարավոր է դուրս գալ Չեմպիոնների լիգայի փլեյ-օֆֆ փուլ, ակումբը և նրանց երկրպագուները գրեթե ընդունել են, որ վերջին խաղում Միլանի «Ինտերի» հետ 3։3 հաշվով ոչ-ոքին նրանց դատապարտել է երկրորդ տարին անընդմեջ խաղալ Եվրոպա լիգայում։ «Բարսելոնան» Չեմպիոնների լիգայի առաջին չորս խաղերում C խմբում վաստակել է ընդամենը 4 միավոր, նրանք երեք միավորով զիջում են «Ինտերին» և ութով զիջում առաջատար Մյունխենի «Բավարիային» մահվան խմբում: Խմբի առաջատար Մյունխենի «Բավարիա»-ն արդեն իր տեղն ամրագրել է Չեմպիոնների լիգայի փլեյ-օֆֆում։ Երկրորդ տեղի համար պայքարը մղվելու է «Բարսելոնա»-ի ու «Ինտեր»-ի միջև։ Վերջինս առաջիկա խաղում մրցելու է խմբի հետնապահ «Վիկտորիա Պլզենի» հետ, որին հաղթելու հավանականությունը շատ մեծ է։
Ընդամենը վեց միավոր է մնացել խաղարկելու համար. դա նշանակում է, որ եթե «Ինտեր»-ը հաղթի Պլզենի Վիկտորիային հաջորդ փուլում, նա կհայտնվի փլեյ-օֆֆ փուլում, իսկ «Բարսելոնա»-ն դուրս կմնա: Ինչքան էլ փորձենք հույսեր փայփայել «Բարսելոնայի» համար, միևնույն է շատ քիչ է հավանականությունը, որ «Բարսելոնա»-ն կհաղթի և՛ «Բավարիա»-ին, և՛ «Պլզեն»-ի, իսկ «Ինտեր»-ը կպարտվի այդ երկուսին։
Այս տարվա մրցապայքարից դուրս մնալը «Բարսելոնա»-ի համար կնշանակի, որ արդեն երկրորդ տարին անընդմեջ դուրս է մնում Չեմպիոնների լիգայի խմբային փուլից։
Ի՞նչ կարժենա «Բարսելոնա»-ի համար Չեմպիոնների լիգայից Եվրոպա լիգա փոխադրվելը
Կարդացեք նաև
Չեմպիոնների լիգայից դուրս մնալը մեծ հարված է «Բարսելոնային» ոչ միայն հեղինակության, այլև արժեքավոր եկամուտների կորստի համար:
Չեմպիոնների լիգան զգալի վարձատրություն է ապահովում այն ակումբների համար, որոնք ավելի են առաջ գնում մրցաշարում, իսկ կորցրած մրցանակային գումարը հսկայական հարված կհասցնի ակումբին: Նրանք դեռ կարող են որոշակի գումար վաստակել Եվրոպա լիգայում, բայց դա շատ ավելի քիչ կլինի, քան այն գումարը, որը կարող էր «Բարսելոնա»-ն ստանալ Չեմպիոնների լիգայում։
Պետք է նկատի ունենալ նաև այն փաստը, որ «Բարսելոնան» գտնվում է ֆինանսական ճգնաժամի մեջ։ Այս ամռանը նրանք ձեռք բերեցին Ռոբերտ Լևանդովսկուն, Ժյուլ Կունդեին և Ռաֆինյային՝ ընդհանուր 153 միլիոն եվրոյով: Թե երբ կկարողանա «Բարսելոնան» հաղթահարել այս ֆինանսական ճգնաժամը, դեռ հայտնի չէ, բայց պարզ է, որ Չեմպիոնների լիգայից դուրս մնալը իր բացասական ազդեցությունը կունենա ակումբի ֆինանսական դրության վրա։
Արուսյակ Եղիազարյան
