«Ընդդեմ իրավական կամայականության» ՀԿ նախագահ Լարիսա Ալավերդյանն անդրադարձավ Արցախի կարգավիճակի հարցով Հայաստանում ժողովրդի մեջ ձեւավորված երկու ճամբարներին: Ժողովրդի մի ստվար մասը համոզված է, որ Արցախը երբեք չի եղել եւ չի լինելու Ադրբեջանի կազմում, իսկ մի որոշ հատվածն էլ, հատկապես իշխանությունը, կարծում է, որ Արցախը Ադրբեջանի մաս է եւ Արցախի կրկին բռնակցելը Ադրբեջանին արցախահայության համար գոյաբանական վտանգ չէ:
Դիմելով երկրորդ տեսակետը պաշտպանող հատվածին՝ տիկին Ալավերդյանն ասաց. «Ես զարմացած եմ, որ Ստալինի հետեւորդներն այդքան շատ են, այդքան շատ ստալինապաշտ հայեր կան աշխարհում. լինի Հայաստանում, սփյուռքում եւ այլուր: Չէ՞ որ Ստալինն է դա կարգադրել: Որոշում չկա: Անգամ Կավբյուրոն այդպիսի որոշում չի ընդունել: Կա Կավբյուրոյի՝ նախորդ օրն ընդունված մեկ որոշում, որով Արցախը ճանաչվում է Հայաստանի մասը: Իսկ հաջորդ օրը եղել է Ստալինի կարգադրությունը: Սիրելիներս, Ստալինը լուծում էր բոլորովին այլ խնդիր: Նա լուծում էր Սովետական Միության կայացման խնդիրը եւ անում այնպես, որ տարբեր էթնոս ազգերի ներկայացուցիչները հայտնվեն խուճուճ իրավիճակներում: Ինչո՞ւ եք դուք ուզում շարունակել Ստալինի այդ աշխատանքը: Այդ ճամբարը, որը ավելի լավ է չլիներ, Ստալինի ջատագովներն են, բայց մեկ տարբերությամբ: Ստալինն է պնդել, որ անպայման պետք է լինի ինքնավարություն:
Այդ ճամբարը, որ կա հիմա Հայաստանում, մեզ տանում է Դեր Զոր: Թող չփորձեն ուրեւէ ուրիշ բանաձեւ գտնել: Բոլոր նրանք, ովքեր մոլորված են, խաբված են կամ չգիտեմ էլ ինչ են, հանցակից են դառնում, որովհետեւ այդպես նրանք հայ ազգը տանում են Դեր Զորի ճանապարհով: Եվ դա անում են օրը ցերեկով»:
Աշոտ ՀԱԿՈԲՅԱՆ
