Ադրբեջանի նախագահի՝ անվտանգության հարցերով օգնական Հիքմեթ Հաջիևը Բաքվում հավատարմագրված դիվանագիտական կորպուսի ներկայացուցիչների հետ հանդիպմանն ասել է, որ Կաշենի և Դրմբոնի հանքավայրերի «անօրինական շահագործումը» պետք է դադարեցվի:
«Հայաստանը ադրբեջանական տարածքների օկուպացիայի տարիներին անօրինական օգտագործել է մեր ռեսուրսները և հարված է հասցրել շրջակա միջավայրին: Այժմ մենք ականատես ենք լինում նմանատիպ գործողությունների ռուս խաղաղապահների վերահսկողության տակ գտնվող տարածքներում»,- ասել է Հաջիևը:
Նրա խոսքով՝ իրենց ունեցած տեղեկություններով նկատվել է «անօրինական շահագործման ակտիվացում», մասնավորապես Դրմբոնի ոսկու հանքավայրում, ինչպես նաև դրա հետևանքով բնապահպանական վիճակի սրացում: «Այդ հարցը քննարկվել է Ադրբեջանի համապատասխան կառույցների հետ, և պաշտպանության նախարարությունն այդ հարցով դիմել է խաղաղապահներին: Կողմերի բանակցությունների արդյունքում համաձայնություն է եղել, որ դեկտեմբերի 10-ից կսկսվի մոնիթորինգ: Անօրինական գործունեությունը պետք է դադարեցվի, անհրաժեշտ է գնահատել շրջակա միջավայրին հասցված վնասը»,- ասել է Հաջիևը:
Կարդացեք նաև
Պատրաստեց Վիկտորյա ԱՆԴՐԵԱՍՅԱՆԸ
