«Սկզբնաղբյուրի նկատմամբ չկա որևէ դատական պահանջ, ոչ մի պահանջագիր չի ուղարկվել , ոչ մի դատական հայց չի ներկայացվել սկզբնաղբյուրի նկատմամբ, որպեսզի իրենք հերքեն իրենց իսկ տեսանյութը կամ գրառումները, բայց այդ պահանջը ուղարկվել է ինձ, և հայցը ներկայացվել է հենց իմ դեմ: Կարծում եմ՝ սա կոնկրետ առիթ էր կոնկրետ դատական ակտից հետո, երբ «Լիդիան Արմենիա» ընկերությունը Վերաքննիչ դատարանում կարողացավ ստանալ մի ակտ, որտեղ գրված էր, որ ես պետք է իրենց վճարեմ 1 մլն 224 հազար դրամ, այժմ էլ Զանգեզուրի պղնձամոլիբդենային գործարանն է, դատական նման անարդար ակտից հետո, օգտվում առիթից և նման հայց է ներկայացնում իմ դեմ»: Այս մասին այսօր «Մեդիա» կենտրոնում հայտարարեց «Կանաչ Հայաստան» բնապահպանական, կրթական ՀԿ նախագահ Թեհմինե Ենոքյանը:
Նրա խոսքով, չլինելով տեղեկատվության սկզբնաղբյուր, ինքը կապ է հաստատել տեսանյութերը հրապարակողների հետ, որոնք պնդել են վթարի պատճառով Ողջի գետի աղտոտման փաստը:
Տեղեկացնենք, որ բնապահպանը դեկտեմբերի 1-ին ֆեյսբուքյան գրառում էր արել. «Երեկ կրկին վթարվել է ԶՄՊԿ-ի պոչամբար գնացող խողովակաշարը, կրկին աղտոտվել է Ողջի գետը, կրկին քրեական գործ է հարուցվել ու կրկին կմոռացվի, ծածկադմփոց կարվի, կանցնեն առաջ»: ԶՊՄԿ-ի ներկայացուցիը դատական հայց է ներկայացրել Երևանի Առաջին ատյանի դատարան. պահանջում է հերքում և վնասի փոխհատուցում՝ 6 մլն դրամի չափով։ Սա էլ հիմք էր հանդիսացել, որպեսզի այսօր «Մեդիա» կենտրոնում կազմակերպվի քննարկում՝ «Ճնշումներ բնապահպանների հանդեպ. ինչո՞ւ են փորձում լռեցնել նրանց» թեմայով:
Քննարկման հենց մեկնարկին գրառման հեղինակը տեղեկացրեց, որ ինքը չէ այդ տեղեկության սկզբնաղբյուրը. «Իրավատեր կապանցիներ» բնապահպանական ՀԿ-ն է նոյեմբերի 30-ին ահազանգել, որ վթար է տեղի ունեցել, աղտոտվել է Ողջի գետը, առկա են դրա մասին տեսանյութերն ու սքրին-վիդեո տարբերակները, ես բաց աղբյուրներն եմ ուսումնասիրել և տեսել եմ, որ շատ լրատվամիջոցներ գրառումներում օգտագործել են «պայթուն պոչամբարում» և նման ձևակերպումներ: Ինչպես ընթերցեցիք, ես «պայթուն պոչամբարում» նման ձևակերպմամբ որևէ գրառում չեմ արել, ես նշել եմ, որ պոչամբար գնացող խողովակաշարն է վնասվել»: Ի պատասխան քննարկումը վարող Լիլիթ Ավագյանի «Կներեք, մինչ Ձեր գալը հերքում չի եղել, չէ՞» դիտարկման՝ բնապահպանն ասաց,- «Նոյեմբերի 30-ին, դեկտեմբերի 1-ին նկատել եմ, որ ընկերությունը հերքում է հրապարակել առ այն, որ պոչամբարում վթար տեղի չի ունեցել, նույն ձևակերպմամբ էլ ինձ է հերքումը ուղարկել, մինչդեռ ես նմա տեքստ չեմ էլ հրապարակել , որ հերքում տամ: Արդյունքում, իրենց փաստաբանը նույն տեքստը ինձ է ուղարկել և 6 մլն. դրամ փոխհատուցման պահանջով դատարան է դիմել»:
Կարդացեք նաև
Նրա խոսքով՝ թեպետ, ընկերության կողմից վարույթ սկսելու համար պետտուրքը վճարված է, սակայն ինքը տեղյակ չէ՝ վարույթ սկսվե՞լ է, թե՞ ոչ:
Քննարկմանը մասնակցում էին նաև «Էկոլուր» տեղեկատվական ՀԿ նախագահ, բնապահպան Ինգա Զարաֆյանը և «Համայնքային համախմբման և աջակցության կենտրոն» ՀԿ նախագահ Օլեգ Դուլգարյանը։
Լուսինե ՄԱՐԳԱՐՅԱՆ
