Այսօր «Բացում» քաղաքացիական նախաձեռնությունը կազմակերպել էր երթ Արցախի ապաշրջափակման հետ կապված՝ պահանջելով ՀՀ կառավարությունից, ՄԱԿ-ից, ԵԱՀԿ ՄԽ համանախագահող երկրներից եւ ԵՄ-ից իրականացնել Բերձորի միջանցքի բացմանն ուղղված գործուն քայլեր։ Երթը մեկնարկեց Հանրապետության հրապարակից:
Մասնակիցները նախ ուղերձ փոխանցեցին կառավարությանը, որտեղ մասնավորապես նշում են, թե ինչ գործիքակազմ կարող են կիրառել՝ Արցախը արտաքին աշխարհի հետ կապող միակ միջանցքը բացելու, կոմունիկացիաներով Արցախն ապահովելու համար:
Նախաձեռնության անդամները պահանջում են Արցախի հայրենակիցների համամարդկային իրավունքների պաշտպանություն և ՄԱԿ-ի կոնվենցիաների կատարում՝ ապահովելով նրանց ժողովրդավարական երկրներին հարիր բոլոր ազատություններով: Նրանց խոսքով՝ Բերձորի միջանցքի բացումը և միջանցքի կարգավիճակի անխաթարությունը վճռորոշ իրողություն կդառնա մեր ժողովրդի պաշպանության ու անվտանգության համար:
Նախաձեռնության անդամները վստահեցնում են, որ կառավարության ներկայիս գործողությունները Լաչինի միջանցքը բացելու ուղղությամբ անբավարար են, որովհետեւ փաստացի շրջափակման 54-րդ օրն է, մարդասիրական աղետ է Արցախում. «Կառավարությունից պահանջում ենք անհապաղ, հենց հիմա ձեռնարկել այնպիսի գործողություններ, որ բացվի Լաչինի ճանաչված միջանցքը: Կառավարության այսպիսի գործողությունները չեն բավարարում ու չեն սպասարկում մարդկանց իրավունքները: Նորից պահանջում ենք կատարել հստակ գործողություններ»:
Կարդացեք նաև
ՄԱԿ-ի գրասենյակի մոտ երթի մասնակիցները հայտարարեցին, որ Արցախի բնակիչներն օժտված են նույն իրավունքներով, ինչ ԱՄՆ-ի, ՌԴ-ի, Ֆրանսիայի, ՄԱԿ-ի անդամ եւ ոչ անդամ երկրների քաղաքացիները, ուստի պետք է միասնական լինեն՝ բացելու Լաչինի միջանցքը:
Հռիփսիմե ՋԵԲԵՋՅԱՆ
