Ինչպես երեկ տեղեկացրել էինք՝ պատրաստվում են «Արփի լիճ ազգային պարկ» ՊՈԱԿ-ի տնօրենի ժամանակավոր պաշտոնակատար նշանակել Ախուրյանի ավագանու նախկին անդամ Գևորգ Բաբուջյանին։
Վերջինս, սակայն, ըստ մեր խմբագրություն հնչած ահազանգի, Շիրակի մարզի ընդհանուր իրավասության դատարանի կողմից սնանկ է ճանաչվել (մեր ձեռքի տակ է դատարանի վճիռը), իսկ համաձայն «Պետական ոչ առևտրային կազմակերպությունների մասին» ՀՀ օրենքի՝ սնանկ ճանաչված անձն իրավունք չունի պետական կազմակերպության գործադիր մարմնում պաշտոնի նշանակվել։
Այսօր, սակայն, անտեսելով օրենքը, Գևորգ Բաբուջյանին նշանակել են «Արփի լիճ ազգային պարկ» ՊՈԱԿ-ի տնօրենի ժամանակավոր պաշտոնակատար։ Եվ սա այն դեպքում, երբ Մուշեղ Մուրադյանի՝ մարզպետի պաշտոնում նշանակվելուց հետո, տնօրենի պարտականությունները մինչ մրցույթ հայտարարելը պաշտոնապես դրվել էին պարկի 8 տարվա տնօրենի տեղակալ Արտակ Ֆարզադյանի ուսերին։
Գևորգ Բաբուջյանը, ըստ տեղեկությունների, բավական մտերիմ է վարչապետ Նիկոլ Փաշինյանի հետ։
Կարդացեք նաև
Ի դեպ, երեկ փորձել էինք պարզաբանումներ ստանալ Գևորգ Բաբուջյանից, նա գերադասելով խոսել ավելի ուշ, հայտնել էր, որ մեծ սիրով կշփվի լրագրողների հետ ու կպատասխանի հարցերին։
Պատրաստ ենք լսել նրա պարզաբանումները։
Նունե ԱՐԵՎՇԱՏՅԱՆ
Լուսանկարը՝ ՀՀ Շրջակա միջավայրի նախարարության
