«Սեռով պայմանավորված աբորտների ի՞նչ ցուցանիշ կա։ Չեմ հասցրել ճշտել, բայց ունեմ տեղեկություն, որ որոշ բժիշկներ աշխատանքային ժամից դուրս հիվանդանոցներում նման միջամտություն են կատարում»,- ԱԺ արտահերթ նիստում կառավարության ծրագրի կատարման 2022թ․-ի ընթացքի մասին զեկույցի քննարկման ժամանակ այսօր առողջապահության նախարար Անահիտ Ավանեսյանին ասաց ՔՊ խմբակցության պատգամավոր Էմմա Պալյանը։
Անահիտ Ավանեսյանը պատասխանեց, որ մինչեւ 2020թ․-ը ցուցանիշների բարելավում կար․ «Ամեն տարի նվազում էր նկատվում, բայց պատերազմը բերեց որոշակի շեղում։ Հուսամ, որ այն կկայունանա։ Ըստ հետազոտության՝ վերջին 30 տարում սեռով պայմանավորված աբորտների հետեւանքով 80 000 աղջիկ երեխա չի ծնվել ՀՀ-ում։ Սա ահռելի թիվ է։ Արհեստական միջամտություն չպետք է լինի։ Այլ երկրներում արդյունքներ կան աղետալի, որոնք չենք ուզում մեզանում ունենալ»։
Լուիզա ՍՈՒՔԻԱՍՅԱՆ
