«Բանակը եղել է հայկական։ Նրանք, ովքեր կասեն, թե բանակը հայկական չի եղել, շատ հեռու են այն իրողություններից, որոնք կայացել են։ Առաջին ազատամարտի ժամանակ, ի տարբերություն ձեր տեսակետների, պատերազմին, մարտական գործողություններին վերաբերող հարցերն ավելի խիստ են դրված եղել»,-ԱԺ արտահերթ նիստում կառավարության ծրագրի կատարման 2022թ․-ի ընթացքի մասին զեկույցի քննարկման ժամանակ այսօր անդրադառնալով ՔՊ խմբակցության պատգամավոր Խաչատուր Սուքիասյանի պնդմանը, թե բանակը չի եղել հայկական՝ ասաց «Հայաստան» խմբակցության պատգամավոր, պաշտպանության նախկին նախարար Սեյրան Օհանյանը։
Նա նշեց․ «Բանակը եղել է հայկական եւ մրցունակ, տարիների ընթացքում ունեցել ձեռքբերումներ։ Ես կարող եմ առանձին հանդիպումներ անել ձեր հետ։ Անգամ դասընթացներ։ Պաշտպանության բանակն ի վիճակի էր պաշտպանել մեր հայրենիքը։ Բանակին թիկունք էր պետք։ Այն ճեղքումը, որը տեղի ունեցավ այդ ուղղությամբ եւ ադրբեջանական բանակը հասավ մինչեւ Շուշի ու ՀՀ, այդ ճեղքումը եղել է այն գոտում, որի հիմնական պատասխանատուն գերագույն գլխավոր հրամանատարն է»։
Լուիզա ՍՈՒՔԻԱՍՅԱՆ
