Այսօր ԱԺ առողջապահության հարցերի հանձնաժողովի նիստում առողջապահության փոխնախարար Լենա Նանուշյանը ներկայացրեց «Հանրային առողջապահության ոլորտում սանիտարահամաճարակաբանական բնույթի արտակարգ իրավիճակների կանխարգելման եւ արձագանքման նպատակով ԱՊՀ պետությունների համագործակցության մասին» համաձայնագիրը վավերացնելու հարցը:
Լենա Նանուշյան
Ըստ փոխնախարարի, համաձայնագրով ԱՊՀ երկրների համագործակցությունը կմեծանա, կկարողանան փոխօգնության միջոցով համաճարակների դեմ պայքարել: ՀՀ-ի կողմից համաձայնագիրը ստորագրվել է հատուկ կարծիքով, իսկ Ադրբեջանի կողմից ստորագրվել է վերապահումով:
ՔՊ պատգամավոր Լուսինե Բադալյանը խնդրեց ներկայացնել ՀՀ հատուկ կարծիքը, որում հայկական կողմը մասնավորապես նշել էր, որ այդ փաստաթղթի դրույթները ՀՀ-ի կողմից Ադրբեջանի նկատմամբ կկիրառվեն 2020-ի նոյեմբերի 9-ի, 2021-ի հունվարի 11-ի եւ նոյեմբերի 26-ի եռակողմ հայտարարություններում ամրագրված բոլոր պայմանավորվածությունների իրականացման, ինչպես նաեւ Ադրբեջանի կողմից ՀՀ տարածքների օկուպացման վերացման, ագրեսիայի հետեւանքների վերացման եւ Լեռնային Ղարաբաղի հակամարտության քաղաքական-դիվանագիտական կարգավորման արդյունքների դեպքում՝ միջազգային իրավունքների նորմերի եւ սկզբունքների համապատասխան:
Կարդացեք նաև
Իսկ Ադրբեջանի վերապահումն այն էր, որ իրենք համաձայնագրի դրույթները չեն կիրառելու ՀՀ-ի նկատմամբ՝ մինչեւ հակամարտության հետեւանքների ամբողջական վերացում եւ ՀՀ-ի ու Ադրբեջանի միջեւ հարաբերությունների կարգավորում:
Արմենուհի Կյուրեղյան
«Հայաստան» խմբակցության պատգամավոր Արմենուհի Կյուրեղյանը հարցրեց. «Ի՞նչ նկատի ունի ադրբեջանական կողմը՝ հակամարտության հետեւանքների ամբողջական վերացում ասելով, արդյոք դա ավելի լայն պահանջ չէ՞, քան մեր պահանջը՝ նոյեմբերի 9-ի փաստաթղթի կիրառում: Նանուշյանը պատասխանեց, որ այդ հարցով զբաղվել է ԱԳՆ-ն ու ինքը չի կարող մանրամասներ ներկայացնել, թե ինչ է նկատի ունեցել Ադրբեջանը՝ այդ վերապահումն ունենալիս:
Նարեկ Զեյնալյան
Հանձնաժողովի նախագահ Նարեկ Զեյնալյանը հարցրեց՝ բյուջեի վրա ի՞նչ պարտավորություն է լինելու համաձայնագրի ընդունման արդյունքում, ի՞նչ ֆինանսական ծախս է ենթադրվում, օրինակ, 5 տարվա ընթացքում՝ Նանուշյանը պատասխանեց, որ նման մոտավոր գնահատական չի կարող ներկայացնել, քանի որ փոխօգնության խմբերը կազմվելու են՝ ելնելով համաճարակից, ծավալներից:
Համաձայնագրի վավերացման հարցը դրական եզրակացություն ստացավ:
Հռիփսիմե ՋԵԲԵՋՅԱՆ
