Հայաստանի և Ադրբեջանի սահմանին՝ Լաչինի միջանցքի սկզբնամասում հսկիչ սահմանային անցակետը կապահովի «դրա օգտագործման թափանցիկությունն ու անվտանգությունը»: Այս մասին հայտարարել է Ադրբեջանի արտգործնախարար Ջեյհուն Բայրամովը Լիտվայի իր գործընկեր Մանտաս Ադոմենասի հետ հանդիպմանը:
Բայրամովն ընդգծել է, որ իրենց կողմից հայ-ադրբեջանական կարգավորման քայլերը բախվում են «Երևանի ոչ կառուցողական դիրքորոշմանը և անդադար սադրանքներին»:
Նա նաև իր գործընկերոջն ասել է, թե «հայկական կողմն անօրինական գործողություններ էր իրականացնում Լաչին – Խանդքենդի (Բերձոր-Ստեփանակերտ – խմբ.) ճանապարհի վրա», և ընդգծել, որ ապրիլի 23-ին տեղադրված անցակետը «կապահովի թափանցիկություն և անվտանգություն»:
Պատրաստեց Վիկտորյա ԱՆԴՐԵԱՍՅԱՆԸ
