Հայաստանը մինչ օրս չի դիմել Միջազգային քրեական դատարան (ՄՔԴ) այն հարցերով, որոնք պատճառ են հանդիսացել Հռոմի ստատուտի վավերացման համար։ Ինչպես փոխանցում է ՏԱՍՍ-ը, այս մասին լրագրողներին հայտնել են ՌԴ Անվտանգության խորհրդում։
«Երեք տարի առաջ, երբ Հայաստանը հապճեպ կարգով վավերացրեց Հռոմի ստատուտը, պաշտոնական պատճառ էր նշվել սահմանային հակամարտությունների սրման ժամանակաշրջանում երկրի տարածքում հնարավոր հանցագործությունների միջազգային հետաքննության հնարավորությունը։ Չեմ ստանձնի դատել, թե որքանով էր այդ բացատրությունը համապատասխանում իրական դրդապատճառներին։ Բայց, որքանով ես գիտեմ, Հայաստանի իշխանությունները մինչ օրս դատարան չեն դիմել, որևէ հետաքննություն չեն նախաձեռնել», — նշել են այնտեղ։
Անվտանգության խորհրդում նաև հիշեցրել են, որ Հռոմի ստատուտի վավերացման և դրա դրույթների իրականացման պարտավորությունն ուղղակիորեն ամրագրված է Հայաստանի և Եվրամիության միջև Համապարփակ և ընդլայնված գործընկերության համաձայնագրում։ Հավելել են՝ «Փաստացի, ՄՔԴ-ի կանոնադրությանը միանալը և դրա իրավազորության ճանաչումը Եվրամիությանն անդամակցություն ստանալուն ձգտող երկրների համար առանցքային քաղաքական պայմաններից մեկն է»:
ՌԴ անվտանգության խորհրդում ընդգծել են, որ ՄՔԴ-ի նկատմամբ Ռուսաստանի դիրքորոշումը քաջ հայտնի է. «ՄՔԴ-ն բազմիցս ապացուցել է իր քաղաքականացվածությունը, կողմնակալությունը, արևմտյան հովանավորների քաղաքական պատվերները կատարելու պատրաստակամությունը և, համապատասխանաբար, միջազգային իրավունքի ու արդարադատության տեսանկյունից իր անպետքությունն ու անօգտակարությունը», — նշել են այնտեղ։
