Թուրքիայի նախագահ Ռեջեբ Թայիփ Էրդողանն իրեն վատ է զգացել ուղիղ եթերի ժամանակ, որից հետո ժամանակավորապես հետաձգվել են 69-ամյա նախագահի բոլոր նախընտրական միջոցառումները: RTVI-ն ամփոփել է Թուրքիայի առողջական վիճակի մասին բոլոր փաստերը և սոցցանցերում շրջանառվող տեղեկությունները:
Տկարություն ուղիղ եթերում
Էրդողանն իրեն վատ է զգացել ապրիլի 25-ի երեկոյան՝ ընտրություններին նվիրված ուղիղ եթերի ժամանակ: Նախ, ուղիղ եթերը սկսվել է նախատեսված ժամանակից մեկուկես ժամ ուշացումով, և Ülke TV հեռուստաալիքի գլխավոր խմբագիր Հասան Օզթյուրքի հարցից հետո ընդհատվել է գովազդով:
Կարդացեք նաև
20 րոպեից Էրդողանը կրկին եթեր է վերադարձել, հեռուստադիտողներից ներողություն խնդրել և հայտնել, որ «ստամոքսի սուր մրսածություն» ունի: Նրա խոսքով՝ այդ պատճառով «ստամոքսի սուր ցավ է զգացել»:
«Ես անգամ մտածում էի հետաձգել եթերը, բայց խոստացել էինք և եկանք»,- ասել է նա:
Էրդողանը շարունակել է հարցազրույցը, բայց այն շարունակվել է միայն մի քանի րոպե:
Միջադեպից հետո թուրքական հեռուստաալիքները և լրատվամիջոցները հայտնեցին, որ Էրդողանի մոտ ստամոքսային մրսածություն է: Նրա մամուլի խոսնակ Իբրահիմ Քալընն էլ հայտնեց, որ պետության ղեկավարի առողջական վիճակը լավ է:
A Haber-ը պնդում է, որ Էրդողանի առողջական վիճակը «ծանր չէ»:
«Մեր նախագահի առողջական վիճակը շատ լավ է … Նրա մոտ թեթև մրսածություն է եղել»,- ասել է Թուրքիայի փոխնախագահ Ֆուաթ Օքթայը:
Կաթվածի մասին տեղեկություններ
Ապրիլի 26-ին սոցցանցերում լուրեր տարածվեցին, թե Թուրքիայի նախագահի մոտ խնդիրներ կան սրտի հետ: Ըստ այդ պնդումների՝ Էրդողանը սրտի կաթվածով ծանր վիճակով տեղափոխվել է հիվանդանոց, նրա կնոջը և ընտանիքի անդամներին իբր խնդրել են գալ հիվանդանոց:
Էրդողանի՝ կաթված ստանալու մասին տեղեկություն հայտնել է նաև AVAZTÜRK-ը: Ըստ պարբերականի՝ Թուրքիայի նախագահի վիճակը գնահատվում է ծանր:
Cumhuriyet թերթը, վկայակոչելով «Փոփոխությունների կուսակցության» նախագահ Մուստաֆա Սարըգյուլին, գրել է, որ ընտրություններից երկու շաբաթ առաջ Էրդողանի մոտ «սրտի հետ կապված խնդիրներ են հայտնաբերվել»:
Թուրքիայի նախագահի աշխատակազմին կից ապատեղեկատվության դեմ պայքարի կենտրոնը չի հաստատել կաթվածի մասին տեղեկությունը:
Նախընտրական միջոցառումների հետաձգում
Ապրիլի 26-ին Էրդողանը հայտնել է, որ բժիշկների խորհրդով մեկ օր կանցկացնի տանը: Նա միջադեպն անվանել է «ոչ մեծ անհարմարություն լարված գրաֆիկի պատճառով»: Էրդողանը հավելել է, որ չորեքշաբթի մի քանի քաղաքներում նախատեսված նախընտրական միջոցառումներում իրեն կփոխարինի փոխնախագահ Ֆուաթ Օքթայը:
Էրդողանը նաև հետաձգել է ապրիլի 27-ին նախատեսված հարցազրույցը, որը պետք է հեռարձակվեր 4 հեռուստաալիքներով: Բացի այդ, Թուրքիայի նախագահը հրաժարվել է Մերսինում նախընտրական հանրահավաքի անցկացումից: Նրա «Արդարություն և զարգացում» կուսակցության փոխնախագահ Էրքան Քանդեմիրը Twitter-ում հայտնել է, որ այն «նախատեսվում է անցկացնել ավելի ուշ»:
Նույն գրառման մեջ Քանդեմիրը հայտնել է, որ Էրդողանը տեսակապի միջոցով կմասնակցի թուրքական առաջին «Աքքույու» ատոմակայանի (ռուս-թուրքական համատեղ նախագիծ) առաջին էներգաբլոկի միջուկային վառելիքի լիցքավորման արարողությանը: Նախկինում նախատեսվում էր, որ Էրդողանն անձամբ կմասնակցի այդ միջոցառմանը: Կրեմլից հայտնել են, որ միջոցառմանը կմասնակցի նաև Ռուսաստանի նախագահ Վլադիմիր Պուտինը՝ դարձյալ տեսակապով:
Սոցցանցերում նաև տեղեկություններ են տարածվել, թե Էրդողանը հետաձգել է մայիսի 3-ի բոլոր նախատեսված հանդիպումները: Այդ տեղեկությունը հաստատող կամ հերքող պաշտոնական տեղեկություն, սակայն, առայժմ չկա:
Էրդողանը գնում է հերթական ընտրություններին
Թուրքիայում նախագահական և խորհրդարանական ընտրությունները նախատեսվում են մայիսի 14-ին: Ինչպես ավելի վաղ գրել էր Bloomberg-ը, Էրդողանն անցկացնում է իր կառավարման ընթացում ամենաբարդ քարոզարշավը: Մասնավորապես, գործակալությունը պնդում է, որ գործող նախագահի համախոհները վերանայում են իրենց հավատարմությունը նրան՝ հաշվի առնելով, որ կա հավանականություն, որ Էրդողանը կարող է կորցնել ընտրողների ձայները կամ զրկվել մեծամասնությունից խորհրդարանում:
Պատրաստեց Վիկտորյա ԱՆԴՐԵԱՍՅԱՆԸ
