Հայաստանն ու Ադրբեջանը խաղաղության բանակցությունների շրջանակում դեռ մի շարք բարդ հարցեր ունեն լուծելու: Այս մասին այսօր տեղի ունեցած ճեպազրույցում հայտարարել է Ռուսաստանի ԱԳՆ տեղեկատվության և մամուլի բաժնի փոխտնօրեն Ալեքսեյ Զայցևը՝ մեկնաբանելով ԱԳՆ պաշտոնյա Դենիս Գոնչարի՝ օրերս արած հայտարարությունն այն մասին, որ հապճեպ ստորագրված պայմանագիրը չի կարող կայուն խաղաղություն ապահովել:
«Ինչ-որ մեկին կարող է շահավետ լինել արագացնել գործընթացը, շուտափույթ ինչ-որ բանի հասնել: Բայց հարցն այն է, թե ինչպես դա հետո կիրականացվի: Որքան հասկանում եմ՝ հենց դրա վրա էր նա (Գոնչարը-խմբ.) շեշտը դնում իր ելույթում»,- ասել է Զայցևը:
Նրա խոսքով՝ հայ-ադրբեջանական խաղաղության պայմանագրի նախապատրաստումը Ռուսաստանի, Հայաստանի և Ադրբեջանի առաջնորդների եռակողմ պայմանավորվածությունների հիմնական տարրերից մեկն է:
«Ռուսական կողմը եռանդուն աջակցում է Բաքվին ու Երևանին այդ փաստաթղթի պատրաստման գործում, օգտագործում է քաղաքական-դիվանագիտական խողովակներ բոլոր մակարդակներում: Ամեն տարի անցկացվում են եռակողմ գագաթնաժողովներ, պարբերաբար հանդիպում են արտգործնախարարները, և վերջերս էլ նման հանդիպում եղել է»,- ասել է Զայցևը:
Կարդացեք նաև
Նրա խոսքով՝ Բաքվից ու Երևանից եկող ազդակները՝ խաղաղության պայմանագրի շուտափույթ կնքմանը հավատարիմ լինելու վերաբերյալ, չեն նշանակում, որ նրանք պատրաստ են համաձայնության գալ ցանկացած պայմաններով:
Պատրաստեց Վիկտորյա ԱՆԴՐԵԱՍՅԱՆԸ
