«Մեր կարգախոսը՝ «Ասեք, կանենք», ծնվել է նրանից, որ նախկինում դուք մեզ ասել եք, մենք արել ենք»,- այսօր Շենգավիթ վարչական շրջանում հրավիրած հանրահավաքում ասաց «Քաղաքացիական պայմանագիր» կուսակցության Երեւանի քաղաքապետի թեկնածու Տիգրան Ավինյանը։
Ավինյանը թվարկեց իրականացվող ծրագրերը՝ նշելով, որ առաջին անգամ են Երեւանում այս ծավալի աշխատանքներ իրականացվում։ «Մեր երեխաները, մեր ծնողները, մենք բոլորս արժանի ենք այդ ծրագրերին, որովհետեւ այս քաղաքը ուրիշների համար միգուցե խոպան է, փող աշխատելու տեղ է, քաղաքական դիվիդենտների ու հնարավորությունների տեղ է, բայց մեզ համար այս քաղաքը մեր տունն է»,- նշեց Ավինյանը։
Նա հավելեց․ «Ես էլ ծնվել եմ այս քաղաքում, մեծացել եմ այս քաղաքում, իմ կյանքն էլ անցել է այս քաղաքում, երեւանցի տղա եմ եղել, ամեն ինչ էլ եղել, եւ ինձ թվում է՝ հիմա եկել է ժամանակը, որ մենք էլ մի քիչ այս քաղաքին վերադարձնենք։ Տասնամյակներ շարունակ այս քաղաքը մեզ տվել է սեր ու ջերմություն, մենք իրեն այդքան էլ լավ բաներ չենք տվել։ Մենք տվել ենք անկանոն տգեղ շինություններ, աղտոտել ենք քաղաքը, հիմա ժամանակը եկել է, որ քաղաքային իշխանությունն իր վերաբերմունքը փոխի քաղաքի նկատմամբ։ Շատ կարեւոր է, որ այդ պրոցեսում ձեր ներգրավվածությունը լինի, դուք այդ գործի տերը լինեք»։
Կարդացեք նաև
«Իրականում մենք ծառայում ենք ձեզ։ Ով չի գիտակցում սա, ով երկար տարիներ նստած էր կաբինետներում, ով մտածում էր, որ ինքը շատ խելացի է բոլորից, դուրս չէր գալիս, մարդկանց հետ չէր շփվում, ինքը չէր կարող իմանալ այն խնդիրների խորքը, որոնք առկա են ձեր բակում, ձեր փողոցի վրա, ձեր թաղամասում։ Մեկ տարվա ընթացքում ես եղել եմ բոլոր վարչական շրջաններում, հնարավորության սահմաններում արել եմ ընդունելություններ, որովհետեւ ուզեցել եմ լսել ձեզ»,- հավելեց Ավինյանը։
Նա նաեւ ասաց, որ 2025 թվականի վերջին Երեւանում չի լինելու հիմնանորոգման կարիք ունեցող մանկապարտեզ։ «Մենք շարունակելու ենք մանկապարտեզաշինությունը, որովհետեւ, այո, մանկապարտեզից է սկսվում բակի, քաղաքի, երկրի զարգացումը՝ տնտեսություն լինի, թե բանակ։ Այն հենասյուները, որոնք դրվում են մանկապարտեզում եւ դպրոցում, հետագայում մեզ տալիս են ավելի առողջ աշակերտներ, ուսանողներ, հետագայում մեզ տալիս են բանակի խելացի զինվորներ, հետագայում տալիս են իրենց գործում հաջողակ քաղաքի, ովքեր զենք են արտադրում, արտադրություն են հիմնում այս երկրում։ Եվ շատ կարեւոր է, որ այդ հիմքը մանկապարտեզից ու դպրոցից սկսած լավը լինի»,- հայտարարեց Ավինյանը։
Ռոզա ՀՈՎՀԱՆՆԻՍՅԱՆ
