ԱԺ արտահերթ նիստում «Պետական կենսաթոշակների մասին» օրենքում փոփոխություններ եւ լրացումներ կատարելու մասին եւ «Պետական նպաստների մասին» օրենքում լրացումներ կատարելու մասին օրենքների նախագծերի փաթեթի երկրորդ ընթերցմամբ քննարկման ժամանակ Աշխատանքի եւ սոցիալական հարցերի նախարար Նարեկ Մկրտչյանը տեղեկացրեց, որ այս փաթեթի շրջանակներում ԱԺ է ներկայացվել նաեւ «Զինվորական ծառայության եւ զինծառայողի կարգավիճակի մասին» օրենքում փոփոխություններ կատարելու փաթեթը։ Ըստ նախարարի՝ դրանով կկարգավորվի Լեռնային Ղարաբաղից բռնի տեղահանված անձանց զինպարգեւավճարներ եւ պատվովճարներ նշանակելու հարցը։
«Հայաստան» խմբակցության պատգամավոր Արծվիկ Մինասյանն ասաց․ «Այս փաթեթը երկու նախագիծ էր իր մեջ ներառում։ Սակայն երեկ արդեն հանձնաժողովի նիստում այս փաթեթում ավելանում է նոր նախագիծ՝ «Զինվորական ծառայության եւ զինծառայողի կարգավիճակի մասին» օրենքում փոփոխությունների նախագիծը, որն, ըստ էության, խորհրդարանում առաջին ընթերցմամբ չի ընդունվել։ Եվ սա խնդրահարույց է։ Ստացվում է, որ հիմա, եթե քվեարկվի, կստացվի մի օրենքի նախագիծ, որը մեկ ընթերցմամբ կընդունվի ամբողջությամբ։ Առաջին հայացքից թվում է, որ շատ լավ է, որ բոլոր պատվովճարների մասով կարգավորում կա, բայց սկզբունքային հարցը հետեւյալն է՝ Արցախի Հանրապետության Ազգային հերոսի եւ Մարտական խաչի ասպետի կոչումով պարգեւատրված անձինք այս կարգավորումից դուրս են մնում՝ ի տարբերություն մարտական գործողություններին մասնակցած, Արցախում ծառայած մեր հայրենակիցների։ Սա լուրջ խնդիր է, այս նախաձեռնությունն այս տեսքով բերելուց առաջ նախապես գոնե պետք է քննարկումներ անցկացվեցին ու լուծումներ առաջարկվեին»,- ասաց Արծվիկ Մինասյանը։
ԱԺ նախագահ Ալեն Սիմոնյան արձագանքեց, որ կանոնակարգում վաղուց փոփոխություններ են եղել։
Կարդացեք նաև
Ռոզա ՀՈՎՀԱՆՆԻՍՅԱՆ
