«Ազգային անվտանգություն» կուսակցության նախագահ Գառնիկ Իսագուլյանին երեկ՝ դեկտեմբերի 1-ին, հարցաքննության ժամանակ վարույթ իրականացնող մարմինը տեղեկացրել է, թե իր որ հայտարարություններն են դիտարկվել բռնության կոչեր:
«Նույնիսկ դրվագի մասին խոսել չեմ կարող, որովհետեւ նախազգուշացվել եմ նախաքննության գաղտնիքի մասին, որի մեջ նույնիսկ ներառել են, կարծում եմ դիտավորյալ, թե որ եթերի մասին է խոսքը գնում»,-մեզ հետ զրույցում ասաց Իսագուլյանի պաշտպան Աննա Ծառուկյանը:
Իսկ վարույթ իրականացնող մարմնի ներկայացրած եթերում արդյո՞ք տեսնում է բռնության կոչեր այս հարցին, փաստաբանը պատասխանեց՝ իհարկե, ոչ. «Քաղաքական գնահատականներ են տրվել, անորոշ, եթե նույնիսկ որեւէ բառ եղել է խնդրահարույց, բացառապես քաղաքացիաիրավական տիրույթում է՝ կա՛մ զրպարտություն, կա՛մ՝ վիրավորանք»:
Մեր հարցին, թե գնահատականներն ուղղված են եղել իշխանությունների՞ն, թե՞ կոնկրետ անձանց, փաստաբանը շարունակեց. «Իշխանության հետ կապված կամ անձերի վերաբերյալ Իսագուլյանը որեւէ հարցի չի պատասխանել, չի մեկնաբանել, հետեւաբար, ես էլ եմ դրանով կաշկանդված: Վկայի կարգավիճակով է առայժմ, բայց որպես այդպիսին կասկածյալ»:
Կարդացեք նաև
Հիշեցնենք, որ Գառնիկ Իսագուլյանը երեկ՝ դեկտեմբերի 1-ին, հրավիրվել է հարցաքննության բռնության կոչեր անելու կասկածանքով:
«Քաղաքական հետապնդման հերթական գործողությունն ենք տեսնում, որովհետեւ բոլոր դրվագները, որոնք այս պահին են դատարանում, առանց հանցակազմի են, ժամանակին նույնիսկ հիմնավոր կասկած չի եղել, սա իրեն լռեցնելու եւս մեկ փորձ է »,- հավելեց փաստաբանը:
Արփինե ՍԻՄՈՆՅԱՆ
