«Զանգ քաղաքացիական շարժման անդամ Միքայել Նահապետյանը Մաշտոցի պուրակում հրավիրված իրազեկման ակցիայի ժամանակ պատասխանեց տարածվող այն լուրերին, թե, հնարավոր է, իրենք նախընտրական կամ նախանախընտրական քարոզարշավ են իրականացնում եւ ընտրությունների մասնակցելու գործընթացի մեջ են։ «Մարդիկ պետք է վերաբերմունք ձեւավորեն, թե սա ինչ է, ինչ գործընթաց է։ Ես իսկապես հավատում եմ, որ Հայաստանը ինչ-որ կետից կարող է էլ գոյություն չունենալ որպես մի պետություն, որի քաղաքացիները ընտրատեղամասերում կամ փողոցներում կարող են բան փոխել։ Ինձ չի թվում, որ մենք իրավունք ունենք մտածելու եկող կամ դրա հաջորդ տարի ընտրություններ լինել-չլինելու եւ դրան նախապատրաստվելու մասին։ Եվ որպեսզի այս խոսակցությունը անիմաստ ու շատ չերկարի, մի կարեւոր բան եմ ուզում ասել։ Քանի դեռ այս պրոցեսը չի հասել իր տրամաբանական հանգրվանին, քանի դեռ մենք չունենք այն արդյունքը, որը նպատակադրել ենք, քանի դեռ Հայաստանը չունի կառավարություն, որը պահում է այս պետության իրավունքները ու շանս է տալիս, որ այս պետությունը ունենա նաեւ վաղվա օր, ես որեւէ ընտրության ոչ 2024-ին, ոչ 2025-ին, ոչ 2026-ին, ոչ էլ դրանից հետո չեմ պատրաստվում մասնակցել։ Սա կարող եք ընկալել որպես հրապարակային, այսքան մարդու, տեսախցիկների առաջ տված խոստում։ Չի լինելու ընտրություն, որին ես կմասնակցեմ, եթե մեր դրված խնդիրը չի լուծվում։
Երկրորդ բանը, որին կուզեմ անդրադառնալ։ Արդեն մի քանի տեղից լսում եմ, որ որոշ բարձրաստիճան պաշտոնյաներ, որոնք, ցավոք, աշխարհում մեզ ներկայացնելու փաստաթուղթ ունեն, մելանխոլիայի մեջ ընկած ժամանակ իրենց բուխարու առաջ մի բաժակ կոնյակով արտահայտվել են, թե իրենք Հայաստանի վերջին հանրապետության վերջին ղեկավարներն են։ Սա մտածողություն է ցույց տալիս։ Ես ուզում եմ իրենց ասածի մի կեսի հետ համաձայնել։ Այո, իրենք Հայաստանի վերջին հանրապետության ղեկավարներն են, որովհետեւ նորը չի լինելու, որովհետեւ այս հանրապետությունը հավերժ է լինելու, որովհետեւ մենք այս հանրապետությունը պահելու ենք։ Հայաստանի Հանրապետությունը իրենց համար ԱՁ չէ, որ մի օր գնան պետռեգիստրում դիմում ներկայացնեն, փակեն, ասեն վերջ, սա պրծավ, կգնանք ՄԱԿ-ում խորհրդատվական ծառայություններ կմատուցենք, ինչպես ապամոնտաժել պետություններ թեմայով։
Սա Հայաստանի վերջին ու հավերժ հանրապետությունն է, Հայաստանը միշտ լինելու է ու Հայաստանը միշտ ունենալու է ղեկավարներ։ Ու այդ ղեկավարները, որոնք մտածելու են միայն այն մասին, որ Հայաստանը լինելու է առաջիկա 100, 1000 եւ 3000 տարում»,-ասաց Միքայել Նահապետյանը։
Կարդացեք նաև
Աշոտ ՀԱԿՈԲՅԱՆ
