Երեկ Հայաստանի վարչապետի աշխատակազմն ու Ադրբեջանի նախագահի վարչակազմը համատեղ հայտարարությամբ տեղեկացրեցին, որ Հայաստանն ազատ է արձակում 2 ադրբեջանցի, Ադրբեջանը՝ 32 հայ զինծառայողների։ Երևանն ու Բաքուն միևնույն ժամանակ շեշտեցին՝ համակարծիք են, որ տարածաշրջանում վաղուց սպասված խաղաղության հասնելու պատմական հնարավորություն կա: Երկու պետությունները վերահաստատեցին ինքնիշխանության և տարածքային ամբողջականության սկզբունքների հարգման հիման վրա հարաբերությունները կարգավորելու և խաղաղության պայմանագրի կնքմանը հասնելու իրենց մտադրությունը: Ներկայացնում ենք այս հայտարարության որոշ արձագանքներ։
ԵՄ-ն համաձայն է՝ տարածաշրջանում խաղաղության հասնելու պատմական հնարավորություն կա և Եվրամիությունը հանձնառու է աջակցելու այդ ջանքերին, X-ի իր էջում գրել է Եվրամիության արտաքին գործերի և անվտանգության հարցերով բարձր ներկայացուցիչ Ժոզեպ Բորելը՝ ողջունելով Երևանի և Բաքվի համատեղ հայտարարությունը կալանավորների փոխադարձ ազատ արձակման և վստահության ամրապնդման այլ միջոցների մասին։
Բորելը Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի երեկվա համատեղ հայտարարությունը կարևոր քաղաքական քայլ է որակել։
Կարդացեք նաև
EU welcomes the joint statement by #Armenia & #Azerbaijan announcing the mutual release of detainees & other confidence building measures-an important political step
We concur – there is a historic chance to achieve peace in the region &are committed to supporting these efforts
— Josep Borrell Fontelles (@JosepBorrellF) December 7, 2023
Միացյալ Նահանգները ողջունում է Հայաստանի և Ադրբեջանի ղեկավարների համատեղ հայտարարությունը 2 ադրբեջանցիների և 32 հայ կալանավորների ազատ արձակման մասին։
Այս հանձնառությունը վստահության ամրապնդման կարևոր միջոց է խաղաղության համաձայնագրի ավարտի և հարաբերությունների կարգավորման աշխատանքների ֆոնին, ասված է ԱՄՆ պետդեպարտամենտի հայտարարությունում։
«Մենք ողջունում ենք Ադրբեջանի նախագահ Ալիևին և Հայաստանի վարչապետ Փաշինյանին՝ Հարավային Կովկասի ժողովրդի համար ավելի խաղաղ և բարգավաճ ապագայի հիմքեր ստեղծելու համատեղ ջանքերի համար», – հայտարարել է Պետդեպարտամենտը՝ հավելելով՝ Վաշինգտոնը կշարունակի խստորեն աջակցել տևական և արժանապատիվ խաղաղության հասնելու ջանքերին։
Թուրքիայի ԱԳՆ-ն հայտարարություն է տարածել՝ գոհունակություն հայտնելով «Ադրբեջանի և Հայաստանի միջև վստահությունը մեծացնող որոշ կոնկրետ քայլեր կատարելու երկու երկրների որոշման կապակցությամբ»։
«Ցանկանում ենք, որ պահ առաջ ստորագրվի Ադրբեջանի և Հայաստանի միջև խաղաղության պայմանագիրը, որը հանդիսանալու է Հարավային Կովկասում մնայուն խաղաղության և կայունության հաստատման համար կարևորագույն զարգացումներից մեկը»,-նշվել է հայտարարությունում։
