Սյունիքի մարզպետ Ռոբերտ Ղուկասյանը փետրվարի 6-ին «Մեղրու տարածաշրջանային բժշկական կենտրոն» ՓԲԸ-ի անձնակազմին է ներկայացրել տնօրենի նորանշանակ պաշտոնակատար Մհեր Աբրահամյանին․ նա այս պաշտոնում է նշանակվել փետրվարի 1-ին՝ մարզպետի № 43-Ա որոշմամբ։ Նույն որոշմամբ տնօրենի պաշտոնակատար Լուսինե Վարդանյանն ազատվել էր պարտականությունների կատարումից։
Պարոն Աբրահամյանն իր մասնագիտական գործունեությունը սկսել էր հենց Մեղրու ԲԿ-ից, ու տեղացիները քաջ ծանոթ են նրա մասնագիտական որակներին։ Այնուհետև աշխատել է նաև Սպիտակի և Գորիսի ԲԿ-ներում, մասնագիտությամբ վիրաբույժ է։
Ռոբերտ Ղուկասյանը շնորհակալություն հայտնեց Լուսինե Վարդանյանին՝ ԲԿ-ն ղեկավարելու տարիներին կատարած աշխատանքի համար ու շնորհավորելով ներկա պաշտոնակատարին՝ հաջողություններ և բեղմնավոր աշխատանք մաղթեց նրան։
Մարզի ղեկավարը նաև խնդրեց ԲԿ-ի կոլեկտիվին ամեն հարցում աջակցել նրան՝ նշելով, որ որպես պաշտոնակատար Մ․ Աբրահամյանի հաջողելու գործոնը մեծապես կախված է անձնակազմի յուրաքանչյուր անդամից։ «Մարդու համար Մեղրիում ապրելու դրական նախապայմաններից մեկն այստեղ որակյալ առողջապահական ծառայություններ ստանալն է, և պետք է համախմբվեք ու միասնական ուժերով աշխատեք բժշկական կենտրոնի առջև ծառացած մարտահրավերներին դիմակայելու ուղղությամբ», – ասաց Ռոբերտ Ղուկասյանը։
Կարդացեք նաև
Շնորհավորանքի խոսք ասացին նաև Մեղրի համայնքի ղեկավար Բագրատ Զաքարյանը, ԲԿ-ն տասը տարի ղեկավարած Լուսինե Վարդանյանը։
Մհեր Աբրահամյանը շնորհակալություն հայտնեց վստահության ու այս պաշտոնում իրեն նշանակելու համար, նշեց, որ տնօրենի պարտականություններին զուգահեռ այստեղ կշարունակի մասնագիտական աշխատանքը, որը Մեղրիում շատ անհրաժեշտ է։ Նա խնդրեց ներկաներին ամեն ինչ անել բնակչության առողջության պահպանման համար և խոստացավ աշխատանք տանել, որպեսզի մեղրեցիները տեղում ստանան առողջապահական այն ծառայությունները, որ հնարավոր է ու չգնան այլ տեղեր։ Այսպիսով՝ տնօրենի նոր պաշտոնակատարը իբրև առաջնահերթություն կարևորեց համայնքի բնակչության վստահության վերականգնումը ԲԿ-ի հանդեպ։
Հանդիպման ընթացքում Սյունիքի մարզպետը պատասխանեց նաև բուժանձնակազմի անդամներին հուզող հարցերին, որոնք վերաբերում էին բժշկական կենտրոնի գործունեությանը։
ՀՀ Սյունիքի մարզպետի աշխատակազմ
