ՀՀ ԱԶԳԱՅԻՆ ԺՈՂՈՎԻ ՆԱԽԱԳԱՀ ՊԱՐՈՆ ԱԼԵՆ ՍԻՄՈՆՅԱՆԻՆ
ՀՀ ԿՐԹՈՒԹՅԱՆ, ԳԻՏՈՒԹՅԱՆ, ՄՇԱԿՈՒՅԹԻ ԵՎ ՍՊՈՐՏԻ ՆԱԽԱՐԱՐ ՏԻԿԻՆ ԺԱՆՆԱ ԱՆԴՐԵԱՍՅԱՆԻՆ
ԴԻՄՈՒՄ
Մենք՝ ներքոստորագրյալներս՝ թանգարանային գործի բնագավառի մասնագետներ, իրավաբաններ, տնտեսագետներ, հանրային, մշակութային գործիչներ, կազմակերպությունների և հասարակության ներկայացուցիչներ, 2024 թվականի փետրվարի 15-ին կլոր սեղանի շուրջ հավաքվելով «Մեսսիեր 53» հյուրանոցային համալիրում և քննարկելով ՀՀ Ազգային Ժողովի կողմից 1-ին ընթերցմամբ ընդունված «Թանգարանների մասին» ՀՀ օրենքի նախագիծը,
Կարդացեք նաև
նկատի առնելով օրենքի նախագծի վերաբերյալ թանգարանների և թանգարանային գործի բնագավառում գործունեություն իրականացնող հասարակական և այլ կազմակերպությունների ներկայացուցիչների անցյալում և ներկայում արված դիտողությունները և առաջարկությունները, մեր անկեղծ մտահոգությունն ենք բարձրաձայնում «Թանգարանների մասին» ՀՀ օրենքի նախագծի վերաբերյալ՝ մեկ անգամ և՛ս համոզվելով մեր կարծիքում, որ այն չի կարգավորում թանգարանային գործի բնագավառում հիմնական իրավահարաբերությունները,
չի նպաստում Հայաստանի Հանրապետության մշակութային և բնական ժառանգության պահպանությանը, Հայաստանի Հանրապետության թանգարանային հավաքանու համալրմանը, հաշվառմանը, պահպանմանը, պահպանությանը և օգտագործմանը, թանգարանների և թանգարանային համակարգի զարգացմանը, մշակութային արժեքների ապօրինի շրջանառության արգելմանը և կանխմանը Հայաստանի Հանրապետությունում,
չի երաշխավորում քաղաքացու կրթության, տեղեկություն և գաղափարներ փնտրելու, ստանալու, տարածելու ազատության, գիտության նվաճումներից օգտվելու, հասարակության մշակութային կյանքին մասնակցելու իրավունքի իրացմանը, միջմշակութային հաղորդակցությանը, մշակութային բազմազանությանը և կայուն զարգացմանը, Հայաստանի Հանրապետության կողմից վավերացված միջազգային պայմանագրերի դրույթների և միջազգային իրավունքի սկզբունքների և կանոնների իրացմանը։
Նկատի ունենալով, որ ՀՀ Ազգային Ժողովի կողմից 1-ին ընթերցմամբ ընդունված օրենքի նախագծում կատարվելիք խմբագրական շտկումները չեն կարող թանգարանային գործի բնագավառում ընդունելի իրավակարգավորումներ և ընթացակարգեր ապահովել, ինչպես նաև՝ այն հանգամանքը, որ թանգարանային համայնքը կարող է մշակել և արդեն իսկ մշակել է «Հայաստանի Հանրապետության թանգարանային հավաքանու և թանգարանների մասին» ՀՀ օրենքի մեկ կամ մի քանի նոր նախագծեր, դիմում և խնդրում ենք ՀՀ Ազգային Ժողովին դադարեցնել «Թանգարանների մասին» ՀՀ օրենքի նախագծի քննարկումը, իսկ մշակույթի ոլորտում Հայաստանի Հանրապետության կառավարության կողմից լիազորված պետական մարմնին հորդորում ենք ետ կանչել ՀՀ Ազգային Ժողովի կողմից 1-ին ընթերցմամբ ընդունված «Թանգարանների մասին» և «Վարչական իրավախախտումների վերաբերյալ Հայաստանի Հանրապետության օրենսգրքում լրացումներ կատարելու մասին» ՀՀ օրենքների նախագծերի փաթեթը՝ համագործակցության արդյունքում թանգարանային համայնքի հետ լրամշակված նախագծերը ՀՀ Ազգային Ժողով ներկայացնելու համար։
«Հայկական պետություն» տեղեկատվական, վերլուծական և գիտահետազոտական նախաձեռնության անունից՝
Կարեն Արիստակեսյան
Թաթուլ Մանասերյան
Ռուբեն Հովհաննիսյան «Հայկական պետություն»
