Առողջապահության նախարար Անահիտ Ավանեսյանն այսօր կառավարության նիստից հետո լրագրողների հետ ճեպազրույցում առողջապահական տեսչական մարմնի բժշկական օգնության եւ սպասարկման վերահսկողության վարչության պետ Քրիստինա Աբրահամյանի (լուսանկարում)՝ ենթադրյալ կաշառք ստանալու համար ձերբակալությունը չմեկնաբանեց։
Հիշեցնենք՝ ըստ «Ազատություն» ռադիոկայանի՝ ԱԱՏՄ վարչության պետին ենթադրյալ կաշառք տվողը «Վիոլետա» ԲԿ-ի տնօրենն է՝ Վիոլետա Սարգսյանը, որը խոստովանական ցուցմունք է տվել:
«Այս պահին ոչինչ չունեմ ասելու»,-գործի առնչությամբ ասաց նախարար Ավանեսյանը։
Նրա խոսքով՝ ընդհանուր առմամբ, տեսչական մարմինների բարեփոխումները երկար ու ծանր ընթացք էին․ «Հույս ունեմ, որ վերջնական գործառույթների շրջանակի հստակեցումը, իրավական հիմքերի ստեղծումը եւ թե կառուցվածքային առումով ինչ արվում է, պետք է նպաստի, որ հնարավորինս զերծ մնանք նման դեպքերից»,-ասաց նախարարը։
Կարդացեք նաև
Լրագրողի հարցին՝ առողջապահական տեսչական մարմնի այդ պաշտոնյային ենթադրաբար կաշառք տված Վիոլետա Սարգսյանը նաեւ ձեռք է բերել ֆիզիոթերապիայի ինստիտուտը, արդյոք նախարարը տեղեկություններ ունի՞ այդ գործարքի մասին, Ավանեսյանը վստահեցրեց, որ գործարքի մանրամասներին ծանոթ չէ։
Նելլի ԲԱԲԱՅԱՆ
