Մենք շատ հետաքրքրված ենք ձեր հանձնաժողովի հետ ավելի սերտ եւ բովանդակային համագործակցություն ունենալու հարցում. ասել է ԱԺ պետական-իրավական հարցերի մշտական հանձնաժողովի նախագահ Վլադիմիր Վարդանյանը՝ փետրվարի 26-ին հանձնաժողովի անդամների հետ ընդունելով ԳԴՀ Բունդեսթագի իրավական հարցերի հանձնաժողովի նախագահ Էլիզաբեթ Վինկելմայեր-Բեքերի գլխավորած պատվիրակությանը:
Շնորհակալություն հայտնելով ընդունելության համար՝ Էլիզաբեթ Վինկելմայեր-Բեքերը հայ գործընկերներին ներկայացրել է իր գլխավորած հանձնաժողովի գործառույթները՝ նշելով, որ դրանցից բացի՝ հանձնաժողովը քննարկում է նաեւ արդիական հարցեր, որոնցից են, օրինակ, պատերազմական գործողությունների իրավաչափությունն ու հանցագործություններն Ուկրաինայում:
Կարդացեք նաև
Այս համատեքստում ԱԺ պետական-իրավական հարցերի մշտական հանձնաժողովի անդամ Արծվիկ Մինասյանն անդրադարձել է Ադրբեջանի կողմից ԼՂ-ի եւ ՀՀ-ի ժողովրդի նկատմամբ իրականացված պատերազմական գործողություններին եւ հանցագործություններին, հետաքրքրվել նաեւ պատերազմական հանցագործներին պատասխանատվության ենթարկելու հնարավորության հարցով:
Զրուցակիցներն անդրադարձել են հանձնաժողովներում օրինագծերի քննարկման հարցին, օրենսդրական աշխատանքի ընթացքում իշխանություն-ընդդիմություն հարաբերություններին եւ տարաձայնություններին: «Մենք միակարծիք ենք այն հարցերում, որոնք վերաբերում են մեր քաղաքացիների կյանքին եւ նրանց կյանքի բարելավմանը»,- ասել է Էլիզաբեթ Վինկելմայեր-Բեքերը՝ նշելով նաեւ իշխող գործընկերների հետ ունեցած տարաձայնությունները:
Անդրադարձ է եղել նաեւ Հայաստանում իրականացվող իրավական ոլորտի բարեփոխումներին:
ՀՀ Ազգային ժողով