Կառավարության այսօրվա նիստում «Երեխա ունեցող ընտանիքների բնակարանային ապահովության պետական աջակցության 2020-2023 թվականների ծրագրերը հաստատելու մասին» նախագծի քննարկման ժամանակ, երբ զեկուցվում էր հարցը՝ վարչապետ Նիկոլ Փաշինյանը փորձեց պարզաբանել, թե ինչպես եւ ովքեր կարող են օգտվել ծրագրից։
«Սկսենք այն ընտանիքներից՝ նոր ձեւավորված, ովքեր չունեն երեխա, այս ծրագիրն իրենց մասին չի։ Նրանք, ովքեր ունեն մի երեխա, այս ծրագիրն իրենց մասին էլ չի։ Բայց նրանք, ովքեր պլանավորում են ունենալ երկրորդ երեխան, այս ծրագիրն արդեն իրենց մասին է։ Ճի՞շտ եմ հասկանում»,-հետաքրքրվեց Փաշինյանը։
Աշխատանքի եւ սոցիալական հարցերի փոխնախարար Դավիթ Խաչատրյանը հայտնեց՝ եթե ընտանիքը չունի երեխա, բայց ունի ընթացիկ հիփոթեքային վարկ, երեխա ծնվելու դեպքում ծրագրից կարող են օգտվել։
Փաշինյանն արձագանքեց․ «Այսինքն, ընտանիքը չունի երեխա, բայց ունի հիփոթեք»։ Այս խոսքերից հետո Փաշինյանն ու կառավարության անդամներն ահագին ծիծաղեցին։
Կարդացեք նաև
Լրջանալուց հետո շարունակեց․ «Չունի երեխա, ունի հիփոթեք, երբ առաջին երեխան ծնվում է, մենք հիփոթեքային վարկի մնացորդի 10%-ի չափով միանվագ գումար ենք տալիս, բայց ոչ ավել, քան 500 հազար դրամը»։
Ըստ նախագծի, ամեն հաջորդ երեխայի ծնվելուց հետո փոխհատուցման գումարն ավելանում է։
Մանրամասն՝ տեսանյութում
Նելլի ԲԱԲԱՅԱՆ
